Mawkyrwat, Lber, 07: Ka Kpohbah, Mawpyrdoi bad ka Sangleiñ kaba hapoh ka Kur Paliar Mawkyrda Lai kpoh Lai Kynthei ha ka sngi Palei ka la pynlong ïa ka Dorbar Kur ha ka shnong Mawpat kawei na ki shnong ha ka thaiñ Umdohlun, South West Khasi Hills District ban ïatai sani ha kaba ïadei bad ka jingpynmih jingpynbna paidbah jong u Bah Elphedius Paliar ban khot Tender na ka bynta ban ai wai ïa ka khlaw Hiang Dieng-song.
Haba kren sha ki lad pathai khubor hadien ba la wai ka Dorbar Pyllun jong ka Kur u Rangbah Kur Bah Bresswell Paliar uba dei ruh u nongaibuit jong ka Kur Paliar u la pynshai ba ka Kur Paliar ka sngewkyndit ban ïohi ïa ka jingpynbna paidbah kaba la mih lyngba ki lad pathai khubor namarba ka Kur kam don jingtip eiei bad kam dei ruh ka nongkynti jongno jongno hynrei la dei trai hok da ka Kur Paliar Mawkyrda Lai Kpoh Lai Kynthei kaba kynthup ïa ka Kpohbah, Mawpyrdoi bad ka Sangleiñ kiba shong ba sah hapoh ki hynriew shnong jong ka Ri Lyngdoh.
Ha kane ka jingïalang ka Dorbar Kur lyngba u bah Bresswell Paliar Rangbah Kur ka la shim ïa ka rai ban pyrshah ïa ka jingleh jong u Bah Elphedius namarba ka long khlem ka jingtip jong ka kur bad ka kur da leilei kam lah ban pdiang ïa ka jingleh donbor.
Ka kur ka kyntu ruh ïa ki paidbah ne kino kino ki briew kiba thmu ban shim wai ba kin ym shim wai ïa ka khlaw khnang ban lait na ki kynrum kynram ne ki jingklumar namar ka dei ka nongkynti bad ka hok longtrai jong ka kur kur Paliar Mawkyrda Lai Kpoh Lai Kynthei kaba kynthup ïa ka Kpohbah, Mawpyrdoi bad ka Sangleiñ ym jong kiwei pat kiba la shu wan kam trai khlem ka nongrim khlem ka hok.
