“Wat pynbor ïa ngi ban dawa sospon ïa u OC Byrnihat PS,” 10 sngi ai por ka HFU ban pynshai da ka jingthoh

Nongpoh, Nailar 04: Tang hadien ba ka seng Hills Farmer Union, Ri-Bhoi District ka la hiar madan ban thad ïa ki kam beaiñ bad ka jingkhrong pisa kaba shyrkhei na ki kali kit ïa ki mrad bam doh kiba wan na shabar ka jylla, ka seng ki nongïalam ka seng kila pynpaw ka jingsngewkhia halor ka jingbym lah jong ki ban ïakynduh bad u Officer In charge ka Byrnihat Police Station wat hadien ba ka seng ka la dep lypa ban ïakut ïa ka por.
Haba kren sha ki lad pathai khubor na ka liang u Bah Alfonbirth Kharsyntiew General Secretary ka seng HFU u la ïathuh bad hadien ba ka seng ka la hiar hynnin ka sngi sha Byrnihat ban lap ïa ka jingshisha halor ka jingshah khrong pisa ki kali kit mrad ba ri kiba wan rung sha ka jylla, na ka liang u Officer Incharge u la phone ban khot ïakren bad namar ba ka jingkhim palat ka por na ka liang jong ki kila pynbeit ban ïakynduh noh mynta ka 4 tarik Nailar ha ka por 11:30 baje mynstep ryngkat ki jingthoh ban pan jingpynshai na u OC hynrei kaba sngewsih ka long haba ki poi ha thanad Byrnihat kim shym la kynduh satia bad haba kylli na ki pulit ba don ha katei ka Police Station ki la ong ba u dang leit sha Court.
Na ka liang ka seng kila ap ïa u haduh ka por 2 baje noh phai sngi hynrei kim shym la kynduh bad ka jingthmu jong ki ka long ban pan jingshai katei kata ka Direct Entry? Shano ka leit kata ka pisa kaba khrong na ki kali? Kaei ka bynta jong ki pulit ban don lang ha kane ka jingkhrong pisa beaiñ? Bad lyngba ka kyndon aïu la khrong ïa katei ka pisa? Bad hadien ka jing bym ïakynduh ka la pynlong ïa ka seng bad ki nongri jingri ban shim da kawei ka rai bad kata ka long ban ai por 10 sngi ïa u OC ka Byrnihat ba un pynshai da ka jingthoh sha ki nongïalam namar ba kim ïoh kynduh, bad lada um lah ban ai jubab da ka jingthoh ka seng kam banse ban mih shakhmat bad wat pynbor ïangi ba ngin kyrpad sha ka sorkar ba kan suspon ïa une u OC namar ki nongrep kila sohsat shaba palat.