Wat lehraiñ ban trei ïa kano kano ka kam lada phi kwah ba ki mynder kin phet na ka jylla: President FKJGP

Nongpoh, K’Lyngkot 18: U Bah Dundee Cliff Khongsit President ba rangbah ka FKJGP haba kren ha ka jingïalang pynskhem ia ki nongkitkam ka FKJGP North Khasi Hills District u la ong ba ka ishu mynder ka dei kawei naki mat ba seng kala ju pynsngew naka por sha ka por sha ka sorkar hynrei haduh mynta kam pat urlong bad kum ka seng kala shim da ka sienjam ban thaw ruh da ka Socio Economic Reforms ban ai mynsiem ia ki khun samla ha kane ka juk ba mynta ba kim dei ban lehraiñ ban trei kano kano ka kam, bad kane kadei kawei naki atiar ban weng ia ki mynder na kane ka jylla jong ngi.
U la ong ruh ba kane ka juk ka dei kaba eh ia ki khun samla namar ki don shibun ki jingtynjuh, bad bun naki samla ki ngop haki kam sniew naka jingbym iohkam iohjam wat hadien ba kila pyndep ia ki jingpule hynrei kum ka seng ka ju lum ju lang ia ki samla ban ai mynsiem ba kin mih shakhmat ban trei minot namar lada ki samla ki mih shakhmat ban trei bad minot ym tang ba kan kyntiew ia ka iohkam iohjam bad ka ioh ka ka kot hynrei kan long ruh ka stieh ïada ba ki mynder kin nym iohlad ban trei ïa kano kano ka kam kaba ki khun samla jong ka jaitbynriew ki lah ban trei.
Shuh shuh u Bah Dundee u la ong ruh ba ka long kaba donkam ba ki khun samla kin don ka pyrkhat pyrdaiñ kaba thymmai ym ban shong jaituh hynrei ban minot ha ka kam ka jam, ki jingpule namar katba nangmih ki sngi duna bha ki samla khasi ki ba pass ia ka eksamin UPSC bad ki kam ophisar baheh baheh ha ka jylla la batbor beit da ki briew kiba nabar, namarkata u la kyntu ia ki khun samla ba kin don ka mynsiem ïaleh ha ka jingim khnang ba ka jaitbynriew jong ngi kan kiew bad kan im.