Wat bishar ïa ka nongbah Shillong tang na kawei ka jingjia kaba la jia ha ka 19 tarik: DC

Shillong, Nailar 23: U Deputy Commissioner jong ka East Khasi Hills u Abhilash Baranwal ha ka sngi u Blei u la ong ba ka jingpynkhreh ïa ki bor pahara kaba jur ha baroh kawei ka nongbah Shillong kan dang bteng hadien ka jingkulmar kaba la jia ha ka 19 tarik u Nailar.
“Dei na kata ka daw ba phi ïohi ïa kine ki jingpahara baroh bad ka jingdon jong ki bor pahara ha kylleng ka nongbah bad ngin bteng ïa kata lymda bad tad haduh ba ki nongshong shnong jong ka Shillong kin sngewshngaiñ,” ong u Baranwal.
U la kyrpad ruh ïa ki nongjngohkai pyrthei ba kim dei ban bishar ïa ka nongbah tang da kawei ka jingjia, hadien ba la mih ki khubor ba bun ki pynsangeh noh ïa ki jingleit jingwan jong ki.
“Nga la ïoh ruh bun tylli ki khubor na kylleng ka ri ha kaba ki ong ba wat leit sha Shillong.Tang kawei ka khubor kaba nga la ai ïa ki ka long ba sngewbha wan sha Shillong, ka long kaba shngain pura, wat bishar ïa kawei ka nongbah namar kawei ka jingjia,” u la ong.
“Ki paidbah ka Shillong bad East Khasi Hills ki pdiang sngewbha ïa bad ki long kiba la pdiang sngewbha tam kum ki nongjngohkai pyrthei bad ka Shillong ka dei ka jaka jngohkai kaba kongsan ha kylleng ka ri bad ka pyrthei.Ngi kwah ïa ki hangne bad ngi kwah ban pdiang sngewbha ïa ki”, u la bynrap.
U DC u la pynthikna ba ka bor pyniaid district ka shim khia ban peit ïa ka jingshngain jong ki nong jngohkai pyrthei.
“Sngewbha wat bishar ïa ka nongbah Shillong tang da kawei ka jingjia.Ngi don hangne na ka bor pyniaid district ban pynthikna ïa ka jingshngain.Ka tnad jngohkai pyrthei ka la ai ruh ïa u helpline number na ka bynta baroh ki nongwan jngohkai pyrthei bad ngi don beit na ka bynta kano kano ka jingiarap kaba donkam”, u la ong.