Kyrpad ka MLMDF ïa ka Meghalaya High Court ban khang ka jingïaid rally da ki briew kiba kah durkhmat

Shillong, Nailar 23: Ka Meghalaya Linguistic Minority Development Forum (MLMDF) ka la kyrpad ïa ka Meghalaya High Court ban pynduh noh ïa ka jingïaumsnam da ki paidbhur kiba la kah durkhmat ha Shillong, nangta ban khang ïa ka jingkah durkhmat ha ki por ba pynlong ïa ki rally, ban pyndonkam ruh da ki drone surveillance ha ki lynti ba don ki jingïakhih pyrshah.
Haba pynrem ïa ki jingïaumsnam ba la buh thong, ka jingma ha ka surok, ka jingpynjulor bad pynpra ïa ki riewkhraw ka ri ha Shillong ha ka por ba la pynlong rally da ka Khasi Students Union (KSU) ha ka 19 tarik mynta u bnai, ka forum ka la kynnoh ba wat hapdeng ki jingai ïa ki SOP, ki briew kiba la kah durkhmat, ki nongñiah thuk thuk ba khlem helmet ki la ïaid lait na ki checkpoint bad ki tur lyngba ki jaka sah bad ki jaka khaïi, ha kaba ki longkmie, ki khynnah bad ki tourist ki la tieng naba u paidbhur u la kawang maw ïa ki bus.
Ka forum ka la ong ba ka la phah ruh ïa ka jingthoh sha u Deputy Commissioner ka East Khasi Hills u Abhilash Baranwal ban pynsangeh ïa ka jingai jingbit ban ïaid rally na ki jaka ba khapngiah ba shong da kiba bun ki kynhun jaitbynriew. Ka la ïathuh ruh ba la phah ïa ki jingthoh sha u Lat ka jylla bad sha u Myntri Rangbah halor ka jingshah pynjulor u motdur jong u Netaji Subhas Chandra Bose bad Swami Vivekananda ha RR Colony, bad la dawa ban tohkit da kaba buh por.
Ïa kane ka jingkyrpad kaba la phah lyngba ka online la phah ruh sha u Myntri ka Tnat ki Kam Pohïing ka sorkar pdeng u Amit Shah bad sha u Myntri Rangbah ban pynweng noh ïa kane ka jingïakajia hapdeng ki arjylla ba marjan.
Ha ka jingthoh ka MLMDF ka la ong ba ka jingbym mynjur kaba jai jai ka dei ka hok ha ka ri synshar paidbah, hynrei ki jingïalumlang kiba pyndonkam da ki tiar kaba la lam shah ka jingshah bom shah tied ha ki paidbhur ka pynhiar dor ïa ka synshar khaddar. Ka la ong ba ka jingpynjulor ïa ki riewkhraw ka ri ka la wanrah ka khubor ha ka ri kaba pynjah burom ia kiba bun kiba ieid ka jingsuk bad ka pymih ïa ka jingbym shngaiñ na ka bynta ki samla ka Meghalaya kiba pule bad kiba trei shabar ka jylla.