Wat bakla bad wat pynjaw ummat ïa ki kmie ki kpa, siew kylliang da ka akor, sneng ki MLA ïa ki samla

Nongpoh, Risaw 30: Ki 2 ngut ki MLA ka Ri-Bhoi ba kynthup ïa u Bah Mayral Born Syiem MLA ka Nongpoh bad u Bah Celestine Lyngdoh MLA ka Umsning kiba la leit ban shim bynta kum u kongsan bad symbud kongsan haka jingpynkut noh ïaka Block Level Chief Minister Youth Engagement Programme ba 2 sngi jong ki samla ba hap ha Umling Block mynta ka sngi kila sneng bad kyntu ïaki samla ban im ka jingim kaba beit bad kiar naki jingsniew khamtam ha kane ka juk kaba mynta haka jingïalang kaba la long ha District Library.
Kum ki nongmihkhmat paidbah kiba la sakhi bad mad ïa shibun ki jingjia haka imlang ka sahlang khamtam ka jingud jingnam jong ki kmie ki kpa kila ong ba wat pynjaw ummat ïala ki kmie kpa bad wat bakla haka jingim, kiar nakaba sniew bad trei shitom ban ioh kheit ïa u soh ba thiang haka jingim namar tang ka jingjop ryngkat ka akor ka burom kaba lah ban pynkmen ïaki.
Kila ong ruh ba kum kine ki jait prokram kiba ai jinghikai bad sei madan ïaka sap ka phong bad pynshlur ïaki khun samla ki long kiba donkam bad kongsan ban pynwandur ïaka jingim bad ban ai mynsiem ïaki samla ha kane ka juk ba mynta, bad kum ki nongmihkhmat kila ai ka jingïaroh ïaka ophis u DSO bad BDO kiba la shimkhia ban pynlong kum kine ki jait prokram.
Ha kane ka sngi ka jingpynkut noh ïa kane ka Block Level Chief Minister Youth Engagement Programme 2025 ba 2 sngi bala sdang naduh ka 29 tarik Risaw nalor kitei ki 2 ngut ki MLA la sakhi ruh da ka jingdonlang u Bah Eric K Dkhar BDO ka Umling C&RD Block, u Bah Bobby Nongbet DSO, ryngkat kiwei kiwei ki riew rangbah, ki nonghikai lem bad ki samla pule na ki skul bad ki college bapher bapher.
Ha kine ki ar sngi jong ka jingpyni sap, naka liang ki samla kiba shim bynta shitrhem haki prokram bapher bapher naduh ki kam dro bad airong, jingtem Guitar, jingrwai bad shad tynrai, jingïakop kyntip ktien bad kiwei kiwei bad naka liang ka ophis u DSO kin sa jied 68 ngut ki samla kiba pawkhmat haki sap bapher bapher ba kin mihkhmat pat sha ka District Level ban ïakhun pyrshah ïa kiwei kiwei ki block ha Ri-Bhoi District.
Kum ka jingai mynsiem ïaki samla naka liang ka ophis u DSO kala sam ruh da ki khusnam bad syrnod sha ki nongjop bad baroh ki nongshim bynta ha katei ka lympung.