Hiar u CM sha Thangsning ban kynduh bad ïohsngew markhmat ïa ka jingeh jong ki paidbah

Shillong, Risaw 30 : U Myntri Rangbah ka jylla u Conrad K. Sangma ha ka sngi Palei u la hiar sha Thangsning kaba hap ha Mawkynrew Block ban kynduh markhmat ïa ki paidbah nongshong shnong bad ruh ban ïoh sngew markhmat na ki ïa ki jingeh ba kum ki nongshong shnong ki kynduh.
Lyngba ka CM Connect, u Myntri Rangbah u plie kyrpang ïa ka lad na ka bynta ki nongshong shnong ba kin pynpaw paidbah ïa ki jingeh ba ki kynduh ha ki shnong ki thaw jong ki bad ruh ba kin ai jingmut ïa ki sienjam kiba ki don. Kane ka dei ruh shi bynta ban wanrah ïa ka jingtreikam kaba biang jingkhein, kaba khuid bad kaba shai kaba weng noh ïa ka jingsngew jngai kaba ju don hapdeng ki paidbah bad ki nongshong shnong ka jylla.
Ha ka jingïasyllok, ki nongïalam shnong ki la ïoh ruh ban pynpaw ïa shibun ki jingeh ba ki kynduh bad ruh ïa ki jingdonkam kiba ki kwah la ka long naduh ka jingdonkam ban don noh ïa ki Higher Secondary Schools bad kumjuh ka Community College. Ki la pynpaw ruh ka jingeh haba ïadei bad ka jingpyntreikam ïa ka skim MNREGA, ka jingdonkam ban don kham bun ki Anganwadi Centre bad kumjuh ïa ki Veterinary Centre. Ki paidbah ki la pynsngew ruh ïa ka jingdonkam ban don ïa ka Water Supply Scheme, ka jingpynbha ïa ki lynti syngkien kumjuh ka jingkieng bad khamtam eh ban don noh da ka madan artificial turf nalor ban pynbiang tikna ïa ka jingpynpoi bording.
Haba jubab halor ki jingpynsngew kiba bun na ki paidbah bad ki nongïalam shnong u Myntri Rangbah u la pynbna ba ki la don bun bha ki song pynroi na ka bynta ka thain. U la pyntip ruh ba la mang haduh 13.35 klur tyngka na ka bynta ban shna thymmai ïa ka jingkieng Jongksha – Thynroit kaban pynsuk ïa ka leit ka wan jong ki paidbah ha ka thain, nangta ban shna ïa ka madan artificial turf kaban don ha syndah bad ka Indoor Stadium ha Mawkynrew Constituency kaban pynjan shuh shuh ïa ki khun samla sha ki lympung ïalehkai.
U la pynbna ruh ban thaw ïa ki 1,700 tylli ki Mini Anganwadi Centre kiba thymmai ha kylleng ka Jylla hapoh ar snem ban kynthup ïa ki shnong ki bym pat don ïa kine ki centre. U ong ruh ba ha kine ki shipor, Mini Anganwadi Centre kin treikam na ki jaka paidbah hapoh lai bnai. Nalor kata, la mynjur ?60 lak na ka bynta ban maramot bad pynbha ïa ki 20 tylli ki Anganwadi Centre kiba la don lypa hapoh ka State Scheme .
Haba ïadei pat bad ka jingpynbiang ïa ka jingshakri na ka bynta ki jingri jingdub, u Myntri Rangbah u la bthah ïa ki ophisar ban pyntikna ïa ka jingbiang ka jingdon ki nongtrei ryngkat ki dawai ha baroh lai tylli ki dispensary hapoh ka block.
Da kaba pyntip ba ka Meghalaya ka pynlut palat 3,500 klur man u snem ha ka pule puthi ha kaba palat 2,000 klur tyngka la mang tang na ka bynta ka tulop, u Myntri Rangbah u la pyntip ruh ba ki la don haduh 4,500 tylli ki skul shimet kiba la ïoh ïa ka bhah kaba haduh 1,000 klur tyngka ka jingkyrshan pisa kaba long ka jingïoh kaba heh tam ha ka thain shatei lam-mihngi baroh kawei.
“Ban pynbha ïa ka jingtreikam bad ban pynthikna ïa ka jingïoh mar ryngkat, ka sorkar kan pynbeit thymmai ïa ki grant na ka bynta ki skul Adhoc bad SSA bad ruh kan pynbeit ryntih ïa ka jingpynïapher ïa ki skul ban pynkhlain ïa ka jingai jinghikai kaba paka,” u la bynrap.
Shuh shuh u la ong ruh, “Bun ki skul ha ki jaka nongkyndong mynta ki treikam kum ki jaka pule ba bun kyrdan – kata kum ha ka kyrdan LP, UP, bad Secondary. Ka jingthmu jong ngi ka long ban pynbeit bad pynkhlain ïa kum kine ki jaka pule ban pynthikna ïa ka jinglah ban ïoh ïa ka jingpule kaba bha ha man la ki kyrdan.”
Halor ka jingkyntiew ïa ki khynnah khunlung kiba dang rit ne ka Early Childhood Development (ECD) u Myntri Rangbah u la pyntip ba ka ECD Mission jong ka Sorkar ka ai ïa ka rukom treikam kaba pura, kaba ïadei bad ka jingim naduh ki snem ba dang rit haduh ka jinglong samla, kaba kynthup ïa ki jingdonkam ha ka koit ka khiah, ka jingbam, bad ka jingpule.
U la shim ruh ïa kane ka kabu ban kyntu ïa ki nongtrei bylla ba kin pynrung kyrteng na ka bynta ki labour card khnang ban ïoh ïa ki jingmyntoi na ka bha ka miat hapoh ka Labour Cess Fund.
Ha kane ka sngi na ka liang ki nongrep ki la pynpaw ïa ki jingsngewkhia halor ka jingdonkam ïa ki symbai bad ki tiar rep, ha kaba u Myntri Rangbah ka Jylla u la pynbna ba yn pynïar ïa ka jingtreikam jong ka skhim CM FARM+ bad CM SEEDS, bad yn ai pisa shuh shuh ban kyrshan ïa ki kam rep bapher bapher.
Haba ai khublei ïa ki nongshong shnong kiba la ïashim bynta langha kane ka prokram, u Myntri Rangbah ka Jylla u la ong, “Ki jingai jingmut ba kordor bad ka jingïatreilang jong phi ka pynlah ïa ngi ban shakri kham bha ïa phi. Ryngkat, ngin tei ïa ki shnong kiba khlaiñ bad pynthikna ba man la ka longïing kan ïoh jingmyntoi na ki jingpyrshang pynroi jong ngi.”