Shillong, Risaw 30 : Ka kynhun jong ki samla pule bad ki nonghikai ba la jied na ka North Eastern Hill University (NEHU), Shillong, ki leit ban ïashim bynta ha ka Workshop ha Bhutan ba la tip kum ka “Bhutan-India Friendship Workshop Empowering Climate Action: AI, IoT, Robotics, and Artistic Fusion for a Sustainable Indo-Bhutan Future” kaba long ha Jigme Namgyel Engineering College (JNEC), Dewathang, Bhutan.
Kane ka workshop kaba la sdang ha ka 27 tarik Risaw bad kaban kut ha ka 31 tarik u Risaw 2025, la bei tyngka da ka India-Bhutan Foundation (IBF) bad ka wallam lut ïa ki nonghikai bad ki samla pule na ki hynniew tylli ki jaka pule, kynthup ïa ka NEHU, ban ïasam ïa ki jingtip bad ki jingmut halor ka ishu kaba ïadei bad ka jingkylla ka suiñbneng bad ka roi ka par kaba neh.
Ïa kane ka kynhun na NEHU la ïalam da u Prof. Dinesh Bhatia na ka tnad Biomedical Engineering, uba la don ka bynta kaba kongsan ha kaba pynbiang bad pynbeit ïa kane ka kam bad ka IBF. Ka thong jong kane ka lympung ka long ban ïatai bad ïa thir sani khnang ba yn lah ban weng ïa ki jingeh kiba bun ha ka pyrthei, khamtam eh ïa ka jingkylla ka suinbneng bad bad khamtam eh ban pynkhlain ïa ka jingïadei bad jingïatreilang hapdeng ka India bad ka Bhutan.
Ïa kane ka workshop la plie paidbah da u Sh. G. Ajith Kumar, Consulate General of India sha Phuentsholing, Bhutan, uba la ban jur halor ka jingdonkam jong ka jingkitkhlieh lang ha kaba ïadei bad ka jingkylla ka mariang.
U Prof. S. Umdor, Pro-Vice Chancellor ka NEHU, u la ai ka jingkitbok kitrwiang sha ka kynhun bad ki nongpynïaid, da kaba pynpaw ïa ka jingdonkam ban pynduna ïa ka jingkylla ka suinbneng bad ban pynneh pynsah ïa ka mariang na ka bynta ka sawdong sawkun kaba neh.
