Nongpoh, Risaw 30: Khnang ba ki Dribar kin tip kham bha ïa ki kyndon aiñ ñiah kali ha ki surokbah ban shngaiñ ki paidbah ha ka leit ka wan bad ban lait na kino kino ki jingjia ba ïatyngkhuh kali ne ki jingjia ba sngewsih, ka tnad Pulit Ri Bhoi mynta ka sngi ka la bteng sa ban pyni da ki nuksa ïa ki Drirbar naduh ki Kali heh haduh ki Kali rit ba kin tip da kano ka lynti ba ki dei ban ïaid ha ki surokbah.
Ïa kane ka jingpyni syndon da ki nuksa la pynlong ha surok Umsning By-pass kaba dei ha ka jingïalam u Additional Superintendent of Police ka Ri Bhoi u Orville Massar da ka jingdon lang ki ophisar bad kiwei kiwei ki pulit na ka tnad Traffic ka Ri Bhoi.
Ban pynkynmaw, ka tnad Pulit Ri Bhoi ka la trei borbah shisha ban tehlakam ïa ki Kali ba pynkhein ain ha Ri Bhoi bad naduh ba la tehpyrkhing bun ki Kali ki la bud ryntih ïa ki kyndon bad khatam ka jingieng beaiñ ha ki surokbah ka la duna bha bad wat ki jingjia ïa tyngkhuh kali bad ki jingjia ba sngewsih ruh ki la duna bha ha Ri Bhoi.
Haba kren sha ki Nongthoh khubor, u SSP ka Ri Bhoi u VS Rathore, u la ong ba kane ka jingshim khia ki pulit ban pyni syndon da ki nuksa ïa ki Dribar, ka long ka jinghikai ba kin tip kumno ban ïaid ha kane ka surokbah ba ïada na ka jingïatyngkhuh kali ne ki jingjia ba sngewsih.
U ong ruh ban sngewthuh ne ban tip shai ki dribar jongki Kali heh ne ki Kali rit, la hikai shuwa ba kin ïaid nyngkng na ka liang ka diang jong ka surok, bud sa na ka liang ka mon ka surok bad sa phah ïaid kyllaiñ (Zig zag) bad hadien kata kin jied kano ka rukom ba shngaiñ ban ïaid bad kane ka long ka jinghikai ba ki hap ban bud katkum ki kyndon aiñ ñiah kali kata ban shngain ki paidbah ha ka leit ka wan lyngba jong kane ka surokbah.
Shuh shuh, u la bynrap ruh da kaba ong, ba kine ki long kita ki jinghikai ba ki dribar ki hap ban tip ïa ki kyndon aiñ ñiah kali bad nangne shakhmat ki hap ban bud ryntih, namar ka thong jong ka tnad Pulit ka long ban wan ïa kata ka jingshngaiñ haba ïaid lyngba kane ka surokbah bad ruh ban ïada na ki jingïatyngkhuh kali ne ki jingjia ba sngewsih ba bunsien ka ju jia tang na ka daw ka jingpynkheiñ kyndon ki Kali, u la bynrap.
