Wat ailad ïalade ban long ki mar khaïi jong ki nongkhaïi ha ka election 2023 : Shanlang Warjri

0

Ka Jylla Meghalaya ka dei kawei na ki Jylla kaba sahdien bha napdeng ki Jylla hapoh ka Ri India ha ki liang baroh, katkum ka report jong ka NITI Aayog ka don ha ka thup jong ki san tylli ki jylla kiba duk tam hapoh ka Ri India, nalor kata ha ka liang ka pule ka puthi ruh ka don shatrai duh, ka jingbun ki samla ki bym donkam don jam ka la nang kiew na ka por sha ka por bad ka Jylla ka la mad ïa ka jinghiar arsut ha ka ioh ka kot bad ka bamsap ka synshar ban pynjot ïa ka Jylla. Haba nga bishar bad pyrkhat sani bha balei ba ka Jylla ka jong ngi ka la hiar arsut ha ki ba bun ki liang ka daw tynrai hi ka dei namar ka jingbym biang ka synshar ka khadar bad ka jingbym lah ban pynmih ïa ki nongsynshar kiba don ka jingkitkhlieh namar ka bor jong ka Pisa ka treikam bha ha ka por jied nongmihkhmat bad pynlong ïa ki Nongkhaïi Heh spah ba kin suk ban jop ïa ka election da ki jingpynbiej lyngba ki Program ba shisien san snem, ka jingleh isynei kaba tang shwa ka election bad kiwei kiwei ki jingpynbiej kiba har rukom ïa ki paidbah bapli.
Sngewkmen pat ha ka jingïaid jong ka por ki Nongshong shnong ki la nang stad bad sngewthuh ïa ka dor ka synshar ka khadar bad ka la mih ruh ka jingïakren jong kiba bun ba ka la dei ka por ban pyrkhat thymmai ha ka rukom jied nongmihkhmat bad ban ym ailad shuh ïa ki Nongkhaïi (Business Man) ban rung khlieh ha Assembly namar kim don por ban shakri hok ïa ki paidbah, kim don ka por ban pyrkhat ïa ki mat ki jura ban ïakren ha Assembly ne ha District Council na ka bynta ka bha ka miat jong U Paidbah hynrei i kumba ki pynlong ïa ka kam nongmihkhmat tang ban suk bad pynheh ïa ka kam khaïi jong ki bad pynlong ïa ka kam synshar khadar tang kum ka kam kam khaïi (Business). Don shibun ki Nongmihkhmat kiba dei tang ki Nongkhaïi (business man) hynrei kim dei kita ki nongthaw ain ne ki nongshna policy, kumta ngi iohi ba ngim don ki policy ba biang ha ka pule ka puthi kat haduh ba ki nonghikai ki hap ban mihkhmat hi ban dawa ïa la ka jong ka hok kat haduh ban da thiah miet ha madan tang ban ioh ïa ka tulop babit jong ki bad kumjuh ban kyntiew ïa ka pule ka puthi nalor kata ki samla pule ki hap ban da mih paidbah ban pynbor ïa ka sorkar ban dawa ïa ka scholarship kaba dei hok ka jong ki. Lada ngi phaikhmat ha kaba ïadei bad ka kam ka jam ki samla (Employment Policy) hangne ruh ngi iohi shibun ki jingduna kat haduh ba ki Samla ka Ri ki hap ban mih ha madan ban pyni ïa ki nongmihkhmat ba kin pyrkhat na ka bynta ka Employment Policy. Lada ngi phai ruh ha ka rep ka riang bad ka kamai kajih ngi iohi ba bun ki nongrep ki hap ban die taddor ïa ki mar rep jong ki wat haduh u pud ban sah miet ha Anjalee ne Motphran kumba ngi sakhi ha ki khubor. Haba ngi phai ruh sha ka koit ka khiah ngi da duna tyngeh tyngeh ki nongmihkhmat ki ban shim khia ïa kita ki PHC ne CHC kumta bun kiba pang ba shitom la hap ban shu kit beit sha ki Hospital Private, kumjuh ruh haba ïadei bad ka Sport ngi hiar dor haduh kata katta namar ngim don ki policy kiba biang bad pynlong ïa ki samla donsap ha ka sports ba kin duh jingkyrmen, kaba kham sngewsih ka long ba la pynbiej ïa ka jingkyrmen ki samla donsap ha ka sports tang shisien san snem shwa ka election kumba ngi sakhi.
Ngi sngewthuh ba baroh shi katta ki paidbah ki sngewthuh ïa kine ki jingeh ba ki mad bad ki la angnud ban ioh la u jong u nongmihkhmat uba don ka jingkitkhlieh bad uba lah ban thaw ki ain bad ki policy katkum ka jingdonkam u paidbah, ngi sakhi ruh ba ki kynhun niam bad ki Balang bapher bapher ki da pynlong ki jingdwai ba kyrpang ban ioh ki nongmihkhmat kiba tip briew tip Blei kiba don ka jingkitkhlieh bad jingshemphang bad uba isih ïa ka spah bymhok. Ka jingangnud jong uba bun uba lang ka dei namar ba ki la thait ïa kita ki nongmihkhmat kiba dei ki nongkhaïi kiba la shu wan ban thied ïa ka hok jong ki da ki jingpynbiej bad ki jingkular kiba ha rukom bad kiba leh pyrthuh kumba ki ithuh eh ïa ki jingeh jong ki paidbah tangba tang shwa ka election.
Haba nga phai ruh sha la ka jong ka Constituency (Mairang Constituency) nga iohi ba kine ki nongmihkhmat ki leh pyrthuh eh kumba ki ithuh ïa ki jingeh u paidbah ha kine ki khyndiat bnai da kaba wan khmih wan jngoh man ka por phewse ha kine ki snem bad ki bnai ba la dep kim don ka jingkitkhlieh wat tang ïa ka umbam umdih ruh kat haduh kaba la pynlong ïa ki longkmie ba kin ïa mih paidbah ban ïaid rally ryngkat ki borti ban pynpaw ïa ka jingbymhun ïa ki nongmihkhmat, ka long ruh kaba eh haduh katta katta ïa ki paidbah ba kin ïakynduh ïa ki nongmihkhmat ne tang ban ioh ban ïakren phone ruh ban ïathuh ïa ka jingeh jong ki namar kim bit tang ban shim ïa ka phone call jong ki rit ki ria. Kine ki Nongmihkhmat ha ka jaka ban kin pyrkhat kumno ban weng ïa ka jingeh ki paidbah phewse ki pynbunkam ïalade ban phet seng na kawei ka party sha kawei party bad thmu ruh ban ïakhun na kawei ka constituency sha kawei pat tang na ka bynta ka jingmyntoi shimet.
Kumta nga ngeit bad nga kyrpad kum ki nongshong shnong kiba la sngewthuh bad shemphang ba phin ym ïapein ïa la ka jong ka hok bad ka pisa bymhok jong ki nongpynbiej tang ha ka aiom election, pyneh rngiew ïa la ka hok bad wat ailad ïalade ban long ki mar khaïi jong ki nongkhaïi ha kane ka elction 2023.
Ki lut 100,200,500 ne 2000 tang ha ka por election kim lah ban weng ïa ka jingduk jingkyrduh bad ki jingeh ha ka imlang sahlang hynrei dei tang lyngba ki policy treikam kiba kat kum ka jingdonkam jong ka por kein kaba lah ban kyntiew ïa ki paidbah ha ki liang baroh.

Leave A Reply

Your email address will not be published.