Yn ïasam ka KHADC bad ka shnong ïa ka khajna na ka viewpoint ba 3klur duna ha Riatnohkhlieh

Shillong, Naiwieng, 13: Ka Khasi Hills Autonomous District Council (KHADC) ka la soi ïa ka soskular ban ïa sam lang ïa ka khajna kaba mih na ka jaka jngohkai kaba don ha Riatnohkhlieh, Maraikaphon ha Sohra ïa kaba la tei ha ka jinglut kaba kot sha ka 3klur duna.
Haba pynbna ïa kane ka rai ha ka sngi plie paidbah ïa katei ka jaka jngohkai, u CEM ka KHADC ba dei ruh u MDC ka thaiñ Bah Titos W Chyne u la ong ba ha kaba sdang hapoh ki 10 snem ka la don ka jingpynbeit ba 65 persen na ka jingmih kan dei ïa ka KHADC bad 35 pat kan dei ïa ka shnong.
Ka jingtei jong ka KHADC da katei ka jaka peitkai kaba haduh 3 klur duna ha Riatnohkhlieh, Maraikaphon Sohra ka la pynlong ïa ki Executive Member ban ai ka jingïaroh ïa ka sienjam ba la shim da u CEM ka Council ba dei ruh u MDC ka thaiñ Bah Titos W Chyne.
Ïa katei ka jaka jngohkai kaba la tei ha ka jinglut kumba 2.70 klur tyngka la plie paidbah ha kane ka sngi Saitjaiñ da u CEM ryngkat ka jingdonlang ki lai ngut ki EM jong ka Council, nangta u Syiem ka Hima Sohra, nongsynshar shnong ka Maraikaphon bad khamtam eh ki nongshong shnong kiba la mih ryntih ban donbynta lang ha katei ka sngi.
Haba ïaroh ïa u CEM halor katei ka projek kaba la tei lyngba ka jingkyrshan pisa jong ka Council, uwei na ki Executive Member, Bah Mitchel Wankhar u la ong, “Kane ka jaka jngohkai kan sa long kawei na ki jaka ha Sohra kaban khring kham bun shuh shuh ki nongwan jngohkai.”
Da kaba pynpaw ïa ka jingkmen ba ka Sohra ka sei ïa u CEM uba stad bad ba shemphang, u Bah Mitchel u la ong, “Sngewtynnad ban ïoh ïa CEM uba stad bad ba shemphang namar dei hapoh ka jingïalam jong u ba ngi la ïoh ïa ka Land Bill kaba dei ka jingkyrkhu ïa ka Jaidbynriew Hynñiewtrep.”
Na ka liang u EM ka tnad Elaka, Bah Jambor War u la ong, “Ka elekshon mynta ka la jan kumta ngim kwah ba ki nong Sohra kin bakla kumta ngi kwah ba ki nong Sohra kin puson bad pynshong nongrim bha namar u Bah Titos u dei uwei na ki nongïalam ba ka Jaidbynriew ka la tip. Ka Ri Khasi ka donbok ban ïoh ïa u CEM uba long shisha u Rangbah Nongïalam ba ïohi jngai na bynta ka ri Khasi.”
U Executive Member ka tnad Council Assets, Bah Teibor Pathaw u la ong, “Kum ki nongsor haba peit ïa kine ki jaka ka pynlong ïangi ban bishni namar kadei ka thaiñ kaba la ïa kyrpang da u Blei.”
Shuh shuh u ong ruh ba da ka jingplie ïa katei ka viewpoint kan long ka jingmyntoi kaba khraw bha ym tang ïa ki paidbah katei ka thain hynrei khamtam eh ïa ka jylla hi baroh kawei.
“Kumba phi ong ba don ki nongmihkhmat kiba la pyrshang mynshwa hynrei kim lah hynrei dei da ka jingtrei shitom jong u CEM bad MDC jong phi ba khatduh la lah ban pynurlong. Kane kan pynmyntoi lang ïa ka KHADC bad ruh ïa ki bor pynïaid,” u la bynrap biang.
Ha kane ka sngi, u Bah Titos u la pynbna ruh ba ka la dep ban don da ka soskular ha kaba ka Council ka la dep ban ïa soi haba ïadei bad ka rukom pynïaid bad ruh ïa ka rukom sam ia ka jingmih na katei ka jaka jngohkai.
U la ong ruh ba Council ka la pynbeit ba ïa ka jingshim wai ban pynïaid ïa katei ka jaka jngohkai kin khot beit da ka Tender ha kaba yn ailad shwa ïa ki trai shnong. U ong ruh ba wat ïa ki dukan ban buh ha katei ka jaka jngohkai ruh kan dei shwa ïa ki trai shnong khnang ba kin ïoh lang ban kyntiew ïa ka ïoh ka kot ha ki iing ki sem jong ki.