Wanpoi ki rangïalehkai ka Liverpool, Portugal bad ka ïing ka sem jong u Diogo Jota ha ka sngi leit ontep

SHILLONG, Naitung 05: Ki rangïalehkai ka Liverpool ki la ïadon lang ryngkat bad ka tnga jong u Diogo Jota bad kiba haïing hasem, ha ka jingleit ontep ïa utei u rangïalehkai phutbol bad ïa u para jong u ha Portugal, hadien ba ki la khlad noh ha ka jingjia aksiden kali ha Spain.
U kpa jong lai ngut ki khun, uba la ïathoh shongkurim ïa ka lok jong u kaba la slem bha, ka Rute Cardoso, 11 sngi shwa ban jia kane ka jingjia kaba sngewsih, ula khlad noh ryngkat bad u para jong u, u Andre Silva, hadien ba ka kali Lamborghini kaba ki shong ka la kem ding ha ka step jong ka sngi Palei.
Ïa ki synduk metïap jong u Jota bad u Silva la rah shapoh ka ïingmane Igreja Matriz de Gondomar kaba don ha ka nongbah Gondomar hajan Porto ha ka step sngi saitjaiñ, hadien kata la bud ka jingwan tuid kiba wan sngewlem.
Kiwei pat kiba la ïohi ba ki la poi ha katei ka jingleh niam ba khatduh ki kynthup ïa u manager jong ka Liverpool u Arne Slot, u kapten u Virgil van Dijk bad ki para ba ïalehkai lang ba kynthup ïa u Andy Robertson, u Conor Bradley, u Ryan Gravenberch, u Cody Gakpo, u Curtis Jones, u Darwin Nunez bad u Joe Gomez.
Kumjuh ruh ha kane ka sngi leit on tep ïa utei u rangïalehkai na Portugal, la don ki paralok jong u ba mih madan ryngkat ïa ka ri, u Bruno Fernandes, na ka Manchester United; U Ruben Dias bad u Bernardo Silva, na Manchester City; U Joao Felix bad u Renato Veiga, na Chelsea; Nelson Semedo, na ka Wolves; U Joao Moutinho, u Rui Patricio bad u Ruben Neves, kumjuh ruh u rangïalehkai barim ka Liverpool u Fabinho, u President ka Porto FC u Andre Villas-Boas bad u manager jong ka kynhun ïalehkai ka ri jong ka Portugal u Roberto Martinez.
Katto katne na ki nongïalehkai ki la rah ïa ki syntiew kiba la shna pynwandur ha ka sopti phutbol katba ki dang poi ha ïingmane.
Ki bahaïing hasem bad ki paralok ki la ïalum lang ha ka sngi Thohdieng shuwa ban pynlong ïa ka jingleh burom khatduh ïa kine ki arngut shi para, da kaba pynïeng khreh da ki syntiew ter ter shabar jong ka ïingmane.
Ki kmie ki kpa ki la leit sha ka Sao Cosme Chapel, ka Capela da Resurreicao, ha Gondomar, ryngkat bad u President jong ka Portugal, u Marcelo Rebelo de Sousa, u Myntri Rangbahduh u Luis Montenegro bad u Agent jong u Jota ruh ki don hangtei.
Ka la don ruh ka jingïalum lang jong ki paidbah kiba bat da ki plakad kiba don ïa ki dur jong baroh arngut ki shi para, kaba heh tam ka pyni ïa u Jota uba phuh samrkhie ha ka sopti jong ka Liverpool FC bad uba shna ïa ka dak dohnud da ki kti jong u.
Ka Liverpool FC ka la pynjlan ïa ka jingwanphai jong ki rangïalehkai jong ka na ka bynta ka samoi ban wan hadien ka jingkhlad noh jong u Jota bad ki rangïalehkai kiba mynshuwa bad kiba mynta ki la ai pynpaw ïa ka jingsngewlem jong ki ïa u bad ïa u para jong u ha ki rynsan social media.
Ki nongkyrshan jong ka Liverpool bad ki nongkyrshan jong kiwei pat ki klob ki la ïasnohktilang da kaba wanrah ïa ki syntiew bad buh habar ka Anfield kum ka dak ban ai burom ïa kitei ki arngut shi para.
ïa u Jota, uba 28 snem ka rta bad u Silva, uba 25 snem ka rta, la lap ba ki la ïap hajan Zamora, ha ka thaiñ shatei lam mihngi jong ka Spain, ha ka step jong ka sngi Palei, hadien ba ka kali Lamborghini, kaba ki ñiah, ka la aksiden ha kawei ka jaka jong ka surok bah, tang hadien shiteng miet jong ka sngi Palei bad ka la kem ding.
Ha kaba ïadei bad kane ka jingjia na ka tnad Pulit jong ka ri Spain ki dang tohkit ïa ka daw jong ka jingjia aksiden, kaba khlem kynthup ïa kawei pat ka kali, ki la ong. Ki la ong ba ki ngeit ba ka lah ban dei na ka daw jong ka taiar kaba la bthei.
ïa ka met jong ki la pynphai noh sha Portugal hadien ba la ithuh da kiba ha ïing. La pynlong ïa ka jingkynmaw burom na ka bynta jong ki ha ka sngi Thohdieng.
Ka jingkhlad jong u Jota ka la jia ar taïew hadien ba u la ïathoh shongkurim ïa ka Rute Cardoso ha ka por ba u dang shong shuti na ka samoi ïalehkai kaba jrong ha kaba u la ïarap ïa ka Liverpool ban jop ïa ka Premier League. Kine ki arngut ki la don lai ngut ki khun, uba rit tam u la kha ha u snem ba la dep.
Ka jingduh noh jong ki ka la pynlong ïa ka jingtuid jong ki khubor sngewlem na ka phutbol ha ka pyrthei bad ki heh sorkar jong ka Portugal.