Shillong, Iaiong 19: U Symbud Myntri Rangbah ka Jylla ba khmih ïa ka tnad PWD (Roads & Buildings) u Bah Prestone Tynsong ha ka sngi Saitjain, ula plie ïa ki projek kiba la kynjoh palat 100 Klur tyngka ha ka shnong Wahiajer kaba pyni ki kam pynroi kiba la leh da ka sorkar MDA .
Ki projek kiba la plie ki kynthup ïa ka jingtei bad jingshna pynbha ïa ka U.N Road, Pdein Mukhim, Sohphoh Mookabeng & Kdohkule (21.255 km) kaba la mang 100 Klur tyngka hapoh jongka State Road Fund, ka jingtei ïa ka jaka jong ka National Games hajan jongka Multi Sports Complex, Wahiajer kaba kot 89.20 lak tyngka, ki kam pynroi ha ka shnong Wahiajer kaba 2 Klur tyngka bad ïa ka Wahiajer Water Supply Scheme hapoh jongka JJM.
U Bah Tynsong ula buh ruh ïa u mawnongrim ban buh ïa ki Lighting System kaba 1400 Lux ha ka Athletic Track bad ka madan ïalehkai Football ha ka Multi Sports Complex, Wahiajer kaba 8.94 Klur tyngka bad ban tei bad pynbha ïa ki surok hapoh jongka Central Roads Infrastructure Fund (CRIF) jong u snem 2025-26 hapoh jong ka Jowai Central Division bad Jowai South Division ha ka jinglut kaba kot 20.92 Klur tyngka.
Haba kren ha ka jingialang, u Bah Tynsong ula ïaroh ïa u Symbud Myntri Rangbah u Bah Sniawbhalang Dhar u MLA ka Nartiang, da kaba ong, “Udei u briew uba trei shitom bha ban shakri ïa ki briew hapoh ka constituency, ka thaiñ bad ïa ka jylla baroh kawei”.
Ha kaba ïadei bad ka jingïaid lynti jong ka sorkar, ula ong, “Hapoh ka jingïalam u Myntri Rangbah u Conrad K Sangma, ngi lah shakri ïa ka jylla la 8 snem. Naduh u snem 2018, Nga lah ban ong ha phi bad ngi lah ïohi ïa ki jingkylla ha kylleng jong ka jylla Meghalaya.”
Haba pynkynmaw halor ka jingwan saphriang ka khlam COVID-19, ula bynrap, “Ngam lah ban klet ïa u snem 2018 haduh 2023. Ki la don ki por, ba ki ummat kila jaw na ki khmat ki jong ngi. Ngi lah ïaid lyngba ki miet kaba ngim ïoh thiah ha ka por ba saphriang ka khlam COVID, hynrei da ka jingkyrkhu U Blei, ngi ïa don lang hangne mynta”.
Haba kdew ïa ki jingtei kiba la dep, u Bah Tynsong ula ong, “Ha ka samoi kaba la dep, ngi la lah ban pyndep ïa ki projek kiba kongsan ha Shillong. Kawei ka dei ka Crowborough Hotel, kaba la long ka jingpeit matsuh la bun phew snem. Lyngba kane ka jingpyndep, haba leit shatei mynta ka sngew kumba don ha Delhi. Ka baar kadei ka Marriott Hotel. La pynlong bun tylli ki jingïalang bad ki VVIP kiba na Delhi ïa kaba la pynlong ha kitei ki artylli ki Five-Star Hotel. Ka dei ka mat jong ka jingsngewsarong bad ka jingkyrkhu kaba khraw ïa ka jylla”.
Ula pynpaw ruh halor ka jingshah kthah na ka jingbym ïohkam, da kaba ong, “Kiba bun na ki samla jong ngi, kiba la pyndep ïa ki jingpule ki jongki bad ïa ki jingïoh jinghikai ha ka ‘Hospitality’ kila wanphai ban ai jingshakri lyngba kitei ki ar tylli ki Hotel.”
Ha kaba ïadei bad ki kam ban pynïar ha ki snem ban wan, ula pynbna ba ka sorkar jylla kala tyrwa ban tei shuh shuh ïa ki Hotel.
“Bun tylli ki MoU la dep ban ïasoi bad nga ngeit ba ha kine ki snem ki ban wan, sa 3 ne 4 tylli ki Five-Star Hotel kin sa mih ha Shillong bad ha kiwei kiwei ki bynta jong ka jylla” ula ong bad ka bynrap, “Shisien ba la pyndep ïa kine ki projek, da ki hajar ngut ki samla kiba trei ha kylleng ki bynta jong ka ri kin wanphai noh ban shakri ha la ka jong ka jylla”.
Haba kren halor ka jingpyrshah ïa ki projek Lumpongdeng, u Bah Tynsong ula banjur ba ka dei ban don ïa ka jingdonbynta lang.“Haba phi pyrshah ïa kaei kaei, kan bha shibun ban ïashong ïakren ha ka miej, ïatai bad ban pynbeit ïa ka mat. Ym don mano mano ruh kiba biang lut. Ngi dei tang ki briew. Phim lah ban ong ba u Bah Prestone bad Sniawbhalang ki dei kiba biang lut, ngim dei kiba biang lut. Hynrei kaba kongsan ka long ban pynbeit ïa ka mat” ula ong.
Ha kaba ïadei bad ka jingshah kynthoh halor ka shongsuk shongsaiñ, ula ong “Ki don kito kiba ong, ba ka Sorkar MDA-I bad MDA-II ki long kiba tlot bha ban khmih ha kaba ïadei bad ka shongsuk shongsaiñ. Hynrei nga kwah ban ong ïa phi ba u Myntri Rangbah, Sniawbhalang bad nga, ngi ngeit ba kum ki nongalam ngi dei ban long kiba jai jai. Ngin plie ïa ki jingkhang jong ngi na ka bynta ban ïakren bad ngi kwah ba ki briew jong ka jylla kin sngewthuh ïa kaei kaei kaba ngi leh baroh”.
Haba ïaroh ïa ka rilum Jaintia, ula pynpaw, “Kaei kaba sngewtynnad ïa ki paidbah ka rilum Jaintia ka dei ba kim ju ïaleh ban wad daw da ka jingthmu ban pynjot ïa uno uno u briew. Wat haba ki wad daw ruh ki leh pat ha ka lynti kaba biang. Dei na kata ka daw ba ka don bha ka kam pynroi ha ka thaiñ”.
Ha kane ka jingïalang la ïadonlang u Symbud Myntri Rangbah u Bah Sniawbhalang Dhar, u Myntri ka koit ka khiah u Bah Wailadmiki Shylla, u Myntri Sorkar barim u Bah Comingone Ymbon, u MLA ka UDP na Mawsynram u Bah Olan Sing Suin, ka MDC na Nongpoh ka Kong Rona Khymdeit, u Commissioner & Secretary u Dr Vijay Kumar bad kiwei kiwei ki heh ki haiñ.
