Jowai, Nohprah 29: Ki nongïalam jong ka shnong Lapangap kila pynpaw ka jingpyrshah jur halor ka jingwan jurip (inspect) jong ki bor ka Assam ban tei ïa ka Border Out Post (BOP) hapoh u pud u sam jong ka shnong Lapangap West Jaiñtia Hills District.
La ïathuh hynnin ka sngi ki nongmihkhmat jong ka Sorkar Assam kiba la poi sha katei ka jaka ki kymthup ïa u Rupsing Terong MLA ka 20th No Baithalangso Lac, ka Rina Terangpi Executive Member ba peit I/C. ICDS Library and Social welfare ka Karbi Anglong Autonomous Council Dephu. GB/SGB, ha ryngkat ki ophisar bad ki katto katne ki riewrangbah na Karbi Anglong.
Ha kane ka jingleit jurip ka Assam ïa ka jaka ba thmu ban tei ïa ka BOP hajan ka wah jong ka shnong Langkiroi Langsangti (river) kaba juh khot ïa katei ka wah da ka Wah Iong-o lane ka (yeingkeiñ psiang) kaba leit lyngba ka surok Shnong Lapangap-Khanduli ïa uba la dep pyntrei lyngba ka scheme MGNREGA daka Shnong Lapangap, Khanduli, Umshangiar bad ka Pdeiñ Talo ha U Snem 2021.
Halor kane naka liang ka Dorbar Shnong Lapangap Pyllun ka pynpaw ka jingpyrshah jur ïa kane ka jingwan jurip jong kitei ki bor jong ka Sorkar Assam kiba la thmu ban tei syndon da ka BOP hajan jong katei ka wah.
Da kaba pynsngew ruh ba katei ka wah (Jaka) ka dang hap hapoh ka Area jong ka Shnong Lapangap Elaka Shilang Myntang, ha kaba ki nongshong shnong katei ka thaiñ ki ju im sngi ïa ka rep ka riang ha katei ka jaka da kaba ïaid lynti na utei u surok ba la dep shna bad katei ka jingleh ka sorkar Assam ka long kum ka lad ban klun ïa ki jaka ki puta jong ka jylla Meghalaya.
