Shillong, Nohprah 29 : Hadien ba lai ngut na ki san ngut ki MLA ba shah sospon ha ka Congress ki la resaiñ noh bad ban pynïasoh sha ka NPP, na ka liang u MLA ka Congress na Mawlai Bah PT Sawkmie u la pynpaw ba ïa mynta hi un ym pat resaiñ satia kum u MLA hynrei un peit tad haduh ban da poi syndon u Snem Thymmai.
“Lehse baroh ki ap khmih lynti ba lano u Bah Process un resaiñ noh kum u MLA, hynrei na ka liang jongnga, nga kwah ban pyntip sha ki paidbah ka constituency ba kaba shai hi ka long ba ngan resaiñ hadien ba la pynbna ïa ka tarik elekshon,” ong u MLA Mawlai.
Shuh shuh u la ïathuh ruh ba mynta kam don shuh kano kano ka jingwit jingwa ba un mih noh na ka Congress ban leit ïakhun noh naka UDP ha ka elekshon 2023.
“Hynrei haba ïadei bad ka rai ban resaiñ kum u MLA nga la rai ba khnang ba ka constituency kan ym sepei namar ki dang bun ki skim bym pat pyndep bad ban sam paidbah bad ki dang don kiba yn dang ïoh na ka sorkar kumta kan long ka jingduhnong kaba khraw lada resaiñ noh,” u la bynrap shuh shuh.
U ong ruh ba kum u MLA lada resaiñ shwa ka shiteng bnai lane shibnai ne 45 sngi kan long ka jingduh nong kaba khraw ïa ka constituency. Shuh shuh u ong ba hadien ba la pynbna ïa ka tarik elekshon ka sorkar jylla kan ym lah shuh ban shim kino kino ki rai namar ïa ka bor synshar la don da u nongpeit shipor bad kumta ha katei hi ka por un sa resaiñ noh bad pynïasoh sha ka UDP kum u dkhot ba pura.
