Ban kyntiew ïa ka kamai ki nongrep, ka ïohkam, ka jingïohlum khajna, ki mat ïakhun elekshon ka Congress

Shillong, Nohprah 29: U President ka Meghalaya Pradesh Congress Committee (MPCC) u Bah Vincent H Pala ha ka sngi Palei u la ong ba ka party ha kane ka kynti kaba mynta kan ïakhun ïa ka elkshon MLA da kaba ka leit sha u paidbah ban khlei ïa ka jubanlak ba ka party kan ïaleh ban kyntiew ïa ka kamai ki nongrep, ka lad aikam aijam, ka jingbym lait tuh ki khajna ba ka sorkar jylla ka dei ban ïoh lada dei ba u paidbah u pynkhamti ïa u lamkam synshar ha dien ka elekshon.
Haba kren sha ki lad pathai khubor u Bah Vincent u la ong ba ka party ka kular ba ha baroh ki district ka party ka kular ba buh ïa ki kynja karkhana ban saiñ ban shna ïa ki mar rep sha ki mar kiba kham lah dor khnang ban kyntiew ïa ka kamai ki nongrep.
“Lada ïa u synsar ngin shu die kilo beit ka dor jong u ka long 150 shi kilo lehse hynrei lada na uto u synsar ngin shna sha u synsar sar ïing ka dor jong u kan long 400 bad na ka 1 kilo la kumno kumno yn lah ban pynmih haduh 3 tylli ki synsar sar ïing bad mutdur na ka 150 ka kamai ba ki ju ïoh na ka shi kilo yn lah ban pynkylla sha ka 1,200 tyngka bad ha kane ka rukom yn lah ban kyntiew ïa ka kamai ki nongrep,” u la ong.
U la ïathuh ruh ba kum u sying bad shynrai lada saiñ ne shna sha kiwei ki mar ym ban shu die beit kumba ïoh na lyngkha rep ka dor jong ki kan pher shibun bad ban leh kumnto u ong donkam ki karkhana. “Dei na kane ka daw ngi tyrwa ba lada gin wan sha ka bor ngin peit kyrpang ïa kane ka bynta,” kular u Bah Vinvent ïa ki nongrep.
Shuh shuh u la ong ba ka jingdon kum kine ki karkhana kaba donkam ha khmat eh ka dei ka bording kaba ka party hadien ba ka wan ha ka por kan peit kumno ban pynmih bording khnang ban weng ïa kane ka jingkyrduh bording kumba long mynta u la ong.
“Kumba long mynta ka jingdonkam bording ka long kumba 650 Mega Watts katba ka jingpynmih ka poi tang 350 kaba mut ka don ka jingduna marshiteng, namarkata, kum ka party ngin wad ki lad ki lynti ban weng ïa kane ka jingduna baording namar ban pynïaid ïa kitei ki karkhan ban saiñ ïa ki mar rep ruh ka bording ka long kaba donkam,” ong u Bah Pala.
Haba ïadei bad ka ïohkam ïohjam ki samla u Bah Vincent u la ong ba ka party kan pah khmat kyrpang ruh ha kaba ïadei bad ka ïohkam ïohjam ki samla kiba la pyndep ki jingpule bapher bapher da kaba kan wanrah ïa ki rynsan kiba kynthup naduh ka sengkam lajong bad kiwei kiwei ki lad ïohkam ïohjam.
U la ong ruh ba ka jinglait tuh ka khajna kaba dei ban wan sha ka pla tyngka ka sorkar ka syrkhei bha ha kine ki sngi bad ong ba lada ka party kan don ha ka bor kan ym ailad ba kane ka jinglait ei ka khajna kan bteng.
“Ka jingmih khajna na ki marpoh khyndew ka jur bha hynrei ka jingdie ïa ki challan tuh kla jur bad kumta ka don ka jinglait ei ka khajna bad lada ngi wan ha ka bor ngin pyndonkam da kine ki juk stad mynta kumno ban tehlakam ïa kane ka jinglait ei ki khajna,” u la bynrap.
Haba la kylli pat la ka party kan don kano kano ka jingïatehlok bad kiwei ki party shuwa ka elekshon u Bah Vincent u la jubaba, “Na ka liang jong ngi ngin ïakhun hi baroh 60 tylli ki constituency marwei namar ngi kwah ruh ba ki paidbah kin ïoh ka kabu ban pynjop bun ngut ki MLA na ka party ban don ka jingskhem ka sorkar namar ki kyrtong kiba ngi tyrwa ruh ki dei kiba kynsai ban mih khmat ïa u paidbah bad kiba don ruh ka jinglah ban leh kumta,” u la ong.