Shillong Lber 16: U Heh ki shipai BSF ne u Additional Director General (ADG) jong ka BSF (Eastern Command), Kolkata, u Ravi Gandhi, ula wan ban jngoh ïa ka jylla Meghlaya ban peit ia ki rukom treikam ki shipai BSF kiba pahara ha khappud ka Meghalaya jong ka ri India bad ka ri Bangladesh.
Katkum ka kyrwoh na ki shipai la ïathuh ba ha kane ka jingwan jngoh kaba 2 sngi kaba dei ha ka sngi saitjaiñ ka 15 bad 16 tarik u Lber, u ADG ula lum ïa ka jingïalang ban sngewthuh bad ban ïoh jingtip halor ka jinglong jingman, ka rukom treikam treijam bad ki kam khynra ïa ki kam beaiñ bad kam bymman ha khappud hapdeng kine ki artylli ki Ri.
Ia u ADG la pdiang sngewbha da u IG ka BSF Meghalaya u Harbax Singh Dhillon ryngkat bad ki heh ophisar ka BSF. U IG ula ai ka jingbatai kaba bniah bha ïa u ADG ha kaba ïadei bad ïa ka jinglong jingman ha ki thaiñ khappud bad ka ri Bangladesh bad ula pyntip ruh ïa ki jingeh ba mad da ki BSF ha ka kam pahara ha khappud bad ïa ki lad kiba kila shim ban ïakhun ïa kitei ki jingeh kiba bun jait.
Katkum ka kyrwoh khubor la ïathuh ba ha ka 15 tarik u Lber, u ADG ha ryngkat ka jingdonlang u IG BSF Meghalaya, kila leit ban khmih bniah ïa ka rukom pynïaid kam bad ka jingpynkhreh lypa jong ka Sector Headquarter Tura.
Ha kane ka jingwan jngoh u Ravi Gandhi ula ai jingkren ïa ki shipai BSF ha ka Sainik Sammelan ha kaba ula ban jur ïa ka jingdonkam ki shipai ba kin long kiba khlaiñ ha ka bor met bad ha ka bor pyrkhat bad kiwei ki jingdonkam kumba la ïoh ki jingshah hikai.
Hadien kane, u ADG ula leit ruh ban ïakynduh ïa u Lat ka Jylla Meghalaya u Paghu Chauhan ha Raj Bhavan, ïa u Chief Secretary ka jylla u Bah D.P. Wahlang bad DGP ka jylla Dr. L.R. Bishnoi.
Ha ka sngi Saitjaiñ, u ADG ula leit ruh ban jurip ïa ka jingtei ïa ka Composite Hospital Mawpat bad ula leit ruh ban jngoh ïa ka BOP Dawki, Pyrdiwah bad Lyngkhat. Ula ïakren ruh bad ki Field Commander bad ki shipai BSF ha kaba ula ïaroh ïa ka jingtrei shitom ka jong ki ha kaban ïada ïa ka ri na kiba bun ki kam sniew.
