Shillong, Lber 16: Kum shi bynta na ka jingsdang ïa la kam ïalap ilekshon kaba la ju leh da u (L) Purno Agitok Sangma, ka National Peoples’ Party ha ka sngi thohdieng ka la sdang ïa ka kam ïalap ilekshon MP napoh ka shnong Adokgre kaba ha North Garo Hills.
Ka Adokgre, kaba la khot da ka kyrteng “Chenanggre” kane ka jaka jong ka jingjop, ka la dei ka jaka ïalap ilekshon jong u Purno Sangma. Ha u snem 2016, u Conrad K. Sangma, u la shimti kum u National President jong ka party bad u la bteng ïa kaei kaba la sdang da u kpa jong u kaba la long mynta la kumba 30 snem tam.
Baroh ki nongïalam jong ka party ba kynthup ïa u State President u Bah Prestone Tynsong, u MP ka Rajya Sabha u Dr W.R. Kharlukhi, u State Working President u Marcuise Marak, bad kiwei pat ki nongïalam jong ka seng ki la ïalum lang hapoh ka shnong Adokgre ban sdang ïa ka kam ïalap ilekshon.
Baroh angut ki kyrtong ka Dr. Ampareen Lyngdoh ka ban ïakhun na Shillong bad ka Agatha K. Sangma na Tura ki la ïadonlang ha kane ka sngi.
Haba kren ha ka jingïalang, u National President ka NPP bad u Myntri Rangbah ka jylla u Conrad K. Sangma u la ong, “La ka long ka ilekshon ha ka MP, MLA ne MDC, u kpa jong ngi u la sdang barabor na kane ka shnong Adokgre namar u la leit ha ka jingjop bad kumta la mih ka kyrteng Chenanggre bad mynta ngi ïeng hakhmat jong phi na kane ka madan ban pynurlong ïa ki jingphoh sniew u nongïalam jong ngi.”
U la ong ba ka Meghalaya haba kren kyllum, bad ka thaiñ Garo haba pyrkhat kyrpang, ka la sakhi ïa ka jingkylla kaba khraw ha kine ki 6 snem ba la dep.
Haba pan ïa ki vote na ka bynta jong ka Agatha, u nongïalam ka NPP u la kyrpad, “Mynta ka sngi ka khun jong u P A Sangma ka ïeng hakhmat jong phi ban pan ïa ka jingkyrshan ka jong phi, ngim lah ban klet ïa u Late P A Sangma.”
U la ong ba kane ka ilekshon ka long kaba kongsan na ka bynta ka NPP bad u la pynpaw ïa ka jingshaniah ban ïoh ka jingjop kaba kham palat ïa ka 1.90 lak kaba ki nongshong shnong ki la ai ha u ha ka por ba u la ïakhun ïa ka ilekshon shiteng samoi hadien ka jingkhlad noh u P A Sangma ha u snem 2016.
“Nga don ka jingshaniah kaba skhem ban ïoh ka jingjop da ka jingïoh vote kaba heh kaba ym duna ïa ka 2.50 lak ne palat ïa ka 3 lak ngut,” pynpaw ka jingshaniah u Conrad Sangma haba pynbna ïa ka jingsdang ka ïalap ilekshon.
