Shillong, Lber, 16: U Sanbor Shullai, u MLA cum Chairman MCIC ka 19th South Shillong Constituency, u la leit ban jurip lang na ka bynta ka jingtei ïa ka surok PWD kaba pynïasoh na Main Entrance Gate jong ka Arts and Culture kaba ha Rilbong (Raid Laban) shaduh ka surok jong ka Rilbong Community Hall bad shaduh ka lynti jong ka Umshyrpi ka surok kaba mynta jong ka PWD Road Rhino Museum Rilbong Shillong.
Ïa kane ka jingjurip lang la don ki Engineer jong ka PWD Department, ki heh opisar jong ka Arts & Culture department bad ki dkhot jong ka Monitoring cum Implementation Committee (MCIC) jong ka 19th South Shillong Constituency.
Kane ka surok kaba dang ïoh ka jingmang pisa kaba thymmai ka la kot sha ka T 1.98 klur kaba la mang hapoh ka PWD scheme bad kaba ia kane ka project la sdang bad mynjur da u MLA u Bah Sanbor Shullai.
Ha ka jingkren na ka liang u Bah Sanbor Shullai, MLA u la pynpaw ïa ka jingai khublei bad ka jingsngewnguh ïa u Myntri Rangbah ka jylla u Conrad Sangma, u Bah Prestone Tynsong, u Symbud Myntri Rangbah ba khmih ïa ka PWD bad kiwei ki tnat bad ïabaroh ki Engineer bad ki heh ophisar jong ka tnat PWD Deptt., ka Arts & Culture Deptt., ka Planning bad Finance Deptt, kiba la pynïar ïa ki jingïarap bad kyrshan ban ïoh ïa jingmang pisa na ka bynta kane ka project na ka bynta ka bha ka miat jong ki nongshong shnong jong ka Zigzag Road Rilbong (Raid Laban), bad khamtam ïa ki nongshong shnong jong ka 19th South Shillong Constituency bad ki paidbah babun.
Baroh ki nongkren ha kane ka jingleit jurip ki la ai ka jingkhublei ïa ka jingtreikam jong u MLA u Bah Sanbor Shullai ban wanrah bun ki kam pynroi bad ki skhim ki bym ju urlong ha ki por kiba mynshwa bad kiba dei ruh ki jingangnud kiba la slem bha jong ki briew ka thaiñ bad kiba la ong ba kum kine ki jait scheme kin ïarap ïa ki jingdonkam na ka bynta ka bha ka miat bad ka roi ka san jong ki nongshong shnong hapoh ka 19th South Constituency bad ki paidbah babun jong ka jylla.
