Shillong, Lber, 16: Ka Sorkar Jylla ha ka sngi Thohdieng lyngba u Myntri Rangbah ka Jylla u Conrad K Sangma, ka la aiti ïa ki kot ki sla jaka sha ka Varun Beverages na ka bynta ban tei ïa ka karkhana pynmih Pepsi ha Mendipathar, North Garo Hills na ka bynta ban kyntiew ïa kane ka thaiñ.
Ha ka jingialang kaba la long ha Mendipathar, u Myntri Rangbah u Conrad K Sangma, ula ai khublei ïa u Chairman jong ka Varun Beverages u Ravi Jaipuria, halor ka jingshim ïa ka rai ban seng ïa katei ka karkhana ha Mendipathar bad ula ong ba katei ka jingshim rai ka la pynïaid shakhmat ïa ka jingwan sengkam ki kompeni ha ka jylla bad ka jingseng ïa ka karkhana ha Mendipathar kan wanrah ïa ka jingkylla ha ka jingim jong ki paidbah ha ka thaiñ khamtam ha kaba iadei bad kane ka jingkyntiew ruh ïa ka ïoh ka kot.
Ha ka jingïalang ula pynpaw ruh ïa ka jingsngewkhublei ïa ka MIDC kaba la pyndep ïa ki kam ki jam ha kaba ïadei bad ka jingaiti ïa ki kot jaka puta ha ka por kaba lyngkot bha bad kaba khlem da la pynslem.
Na ka liang u Myntri Rangbah ula ong ba ka Mendipathar Industrial Growth Centre la dep ban pynbna kum ka Industrial Area ha ki snem kiba la dep hynrei kam shym la don satia pat kano kano ka kam pynroi ha katei ka thaiñ la bun snem kaba la long ruh haduh mynta.
“Da ka jingshim rai ban seng ïa ka Industrial Unit ban song ïa ki umsoh kum ka Pepsi, Mirinda bad kiwei, yn pynkylla ïa ka jingim jong ki paidbah bad ki trai shnong ba kin ïohkam ïohjam,” ong u Myntri Rangbah.
U la pynpaw ruh da kaba ong ba ba ïa ki umsoh la dih beit man la ka sngi bad kidei kiba la song ha ka jylla Assam ne West Bengal.
“Da ka jingdon kane ka Bottling Unit ha Mendipathar ngi lah ban dih ïa kine ki umsoh kiba la song hi hapoh ka jylla jong ngi,” ula ong bad bynrap ba ka kompeni ha ki snem ban wan, kan wad ruh ïa ki lad ki lynti ban song ïa ki umsoh bad ïa kiwei ki mar kiba la pynmih da ki trai jylla kum u sohtrun nalor kiwei.
U Myntri Rangbah ula pyntip ba ka kompeni kan bei T.185 Klur ïa katei ka projek bad yn pyndep hapoh ka 12 bnai.
Katei ka Bottling Plant nalor ka jingsam ïa ki mar kiba pynmih sha ki paidbah ka jylla Meghalaya, kan shalan ruh sha ki jylla kiba marjan.
