Jowai, Lber 16: Ka Khasi Students’ Union Jowai Unit ha ryngkat ka jingsynran lang ki nongïalam ka KSU West Jaiïtia Hills District Unit haka 15 tarik u Lber kila leit jurip ïa ka MCH Hospital Jowai halor ka jingdkoh treikam katei ka hospital.
Kane ka jingleit jurip ka long hadien ba ka seng kala ïoh bun ki jingujor na ki paidbah khamtam kiba wad jingsumar ha kane ka MCH Jowai.
Ha katei ka jingleit jurip la lap shibun ki jingdkoh ha ka rukom trei kam khamtam ka jingduna ki Doktor bad kiba bun na ki nongtrei ki dei kiba dang hapoh ka training kiba lehse kan buh jingma ïa ki paidbah.
Ha katei ka sngi ka seng ka la ïoh ruh ban ïa kynduh ïa i Dr.E Chullet ha ka jinglam khmat da u President ka KSU Jowai Unit u Samla Ewanmi Phawa bad LekiRichard Tyngkan General Secretary ryngkat ka jingdonlang ka kong Ladaplin Hayong President Girls’ Wing
Ha kane ka jingïakynduh ka seng ka la pynsngew sha ki bor ba dei khmih ba kum ki nongïalam seng kim lah ban shu sngap halor ka jingud jingnam ki nongthiah pang.
Ka seng ka la kyntu ïaki bor ba dei peit ban pynbiang ïa ki jingdonkam ha katei ka jaka ai jingsumar khnang ba ki paidbah ba leit thiah pang kin ïoh ïaka jingsumar ba paka khamtam ïa ki duk ki suk.
