Lait thaw ki nongleit nongwan, julor ka kali ba hap ki top mobil na ka trok ha Kuliang

Khliehriat Lber 16: Ki paidbah nongleit nongwan ki la lait thaw salit katba kawei pat ka kali rit ka la julor hadien ki top mobil kiba khia kumba 150 kilo kawei kawei ki la hap kunsan na kawei trok kaba kit ïa ki ha ka lynti surok bah NH-6 ha Kuliang, East Jaiñtia Hills District.
Kane ka jingjia kaba la jia mhnta ka sngi shisha ka la buh jingma shibun ïa ki mynsiem briew bad lah ruh ban ong ba kane ka la wan jia tang namar ka jingsniew palat ka surok NH-6 ha ka thaiñ Narpuh kaba ki kali kim lah satia ban iaid da kaba suk hynrei ki hap ban iaksaid bad ñiom ïa ki thliew ki syar jong kane ka surok kaba la sniew palat pud.
Ka jingsniew jong kane ka surok ym tang ba ka la wanrah ïa ka jingdheng kali kaba jur , hynrei ka buh jingma ruh shibun ïa ki nongleit nongwan kumjuh ïa ki nongshong shnong kiba hap ban iaid man ka sngi lyngba kane ka surok.
Ha kaba iadei bad ka jingsniew palat ka surok National highway ha Narpuh na ka liang ki Rangbah Shnong, ki sengbhalang, ki paidbah jong ka thaiñ ruh na ka por sha ka por ki la ju pynsngew bad muh madan ruh ban iakhih bad kyntu jur ia ka sorkar ba kan shim khia ban phah maramot ïa kane ka surok bad la khmih lyruh ba ka jingmaramot kan sdang noh ha shwa ban poi ka aiom slap namar lada kane ka surok kan shu long sah kumne khlem pep kan wanrah jingma ïa ki paidbah nongleit nongwan bad ïa ki paidbah ka thaiñ.