Nongpoh, Lber 20: Kumba 8 ngut ki nongthoh khubor na New Delhi mynta ka sngi ki la wan jngoh ïa ka Ri-Bhoi District ha Meghalaya ban bishar bñiah ïa ki kam kiba la leh hapoh ka 100 sngi ka jingpyrshang jong ka sorkar ban pynduh jait ïa ka jingpang Tuberculosis (TB).
Katei ka kynhun ki nongthoh khubor ki la ioh ruh ban ïakren bad u Deputy Commissioner ka Ri-Bhoi District, State TB Officer, bad ka District TB Officer bad ki nongai dawai tynrai.
Haba ïakren bad ki lad pathai khubor, u Deputy Commissioner ka Ri-Bhoi, Abhilash Baranwal, u la ong ba ka jylla Meghalaya ka la shim bun ki sienjam hadien ka jingangnud jong ka sorkar bad u Myntri Rangbah duh ban ban pynduh jait ïa ka TB shwa u snem 2025.
U la bynrap ruh ba da ka jingïadon bynta jong ki nongai dawai tynrai bad ki self-help groups, ki nongpang kiba la duh lad ban shah khmih bñiah ki la ïoh lad ban shah test bad shah sumar noh.
Ka kynhun ki nongthoh khubor kin sa leit sa sha Nongbah Shillong ha kine ki 2 sngi bad kin leit ban peit ïa ki Ayushman Arogya Mandirs, ki Primary Health Centres, ka ophis treikam jong ka State TB bad kin ïakynduh ruh ïa ki nongpang TB bad kumjuh ruh kiba la koit na katei ka jingpang.
