Wad lem ki lad ki lynti ba ngin ïoh tih bad khaïi dewïong biang, kyrpad ka SCCOMDEF na u Myntri Rangbah

Shillong, Jylliew 22: Ka State Co-ordination Committee of Coal Owners, Miners, Dealers and Exporters Forum (SCCCOMD&EF) ha ka sngi Nyngkong ka la ïa kynduh ïa u Myntri Rangbah ka Jylla, Conrad K Sangma ban kyntu ïa u ban ban wad lem ki lad ki lynti khnang ban lah ban sdang biang ïa ka jingtih dewïong kaban pynmyntoi lang ïa baroh.
Ha kane ka jingïakynduh kaba la donlang naduh ki ophisar na ka tnad Mining and Geologogy kumjuh u Symbud Myntri Rangbah Bah Sniawbhalang Dhar nalor ki MLA, na ka liang ka Forum ka la aiti ruh da ka dorkhas kaba batai bniah ïa ki jingtyrwa jong ka ban pynim biang ïa ka kam tih bad khaïi dewiong ha ka jylla.
Haba kren sha ki lad pathai khubor hadien ka jingïalang, u Adviser ka SCCCOMD&EF, u Dr. P. Nongtdu, u la ong, “Ngi ki nongtih dewïong ngim dei ki riewshemphang ha ka kam aiñ, kumta ïa ki jingtip ba bniah bad ki jingeh kiba lah ban mih yn sa bishar da ka sorkar bad ki riewshemphang jong ka. Ka jingangnud jong ngi ka long ba kan don ka lynti aiñ kaba plie lad ïa ka jingtih dewïong kaba long katkum ki kyndon. Ka jingtyrwa jong ngi ka long ba ka jaka tih dewïong kan ym palat ïa ka 5 hectare. Ngi sngewkmen ruh ban ïohi ba kane ka jingai jingmut jong ngi ka la ïoh ka jingïohsngewthuh na kiba bun kiba la don bynta ha ka jingïalang.”
Shuh shuh u la ong haba ïadei bad ka ‘open cast mining’, kaba la shah plie naduh u snem 2020, ki kyndon jong ka Sorkar India ki buh ba ka jaka tih dewïong ka dei ban long kumba 100 hectare. “Hynrei ngi la pynpaw sha ka sorkar ba kane kam long kaba lah ban pyntreikam da ki nongtih dewïong rit bad pdeng jong ka jylla.Ka jingdawa jong ngi ka long tang ïa ka scientific underground coal mining, ym ïa ka open cast mining. Na ka bynta ki nongtih dewïong jong ngi, ka jaka kaba heh haduh 5 hectare ka la biang ban leh ïa ka kam tih dewïong da ka rukom kaba stad bad kaba ïada ïa ka mariang. Ban palat ïa kata ka jingheh kam long kaba myntoi namar ka rukom tih ka dei ban long shapoh khyndew,” u la bynrap biang.
Katba na ka liang u Chairman ka SCCCOMD&EF, u Bah Sonny L. Khyriem, u la ong ba ka jingïakren ka long kaba seisoh bad ka la wanrah jingkyrmen ïa ki paidbah kiba ïadei bad ka kam dewiong.
U la ïathuh ruh ba u Advocate General un bishar bniah ïa baroh ki aiñ jong ka Sorkar Pdeng bad ka Sorkar Jylla kiba ïadei bad ka jingtih marpoh khyndew khnang ban wad ïa ki lynti aiñ kiba lah ban plie lad ban sdang biang noh kloi ïa ka kam tih dewiong ha Meghalaya.
Katkum ka jingong jong u, ka Forum ka mihkhmat ïa baroh ki bynta jong ka kam dewiong, naduh ki trai par rit, pdeng haduh kiba heh, bad ka donkam ïa ka jingïatreilang kaba kham jan hapdeng ka sorkar jylla bad ka sorkar pdeng ban pynbeit noh ïa kane ka kam kaba la sahteng slem.
“Ngi sngewkmen ruh ban ïohsngew na u Myntri Rangbah ba ki kam kiba hap hapoh ka bor jong ka sorkar jylla yn peit bad leh da ka jylla hi, katba ïa ki bynta kiba donkam jingïakren bad ka sorkar pdeng, yn sa buddien bad shim ïa ki sienjam kiba donkam.”