Khliehriat, Jymmang, 09: U samla Lektor Dkhar na East Jaiñtia Hills District ha ka sngi Balang mynta ka taiew u la ujor sha u Deputy Commissioner ka East Jaiñtia Hills District ban pynpaw ka jingsngewkhia namar ka jingthut ka leit ka wan jong ki kali kaba ju wanrah ïa ka dheng kali ruh ha surok NH-6 ha Ladrymbai bad ha Khliehriat namar ka jing pynieng kali pathar ki briew harud surok bad ka jingñiah khlemakor ïa ki kali.
U la pynpaw ba kane ka jingthut ka leit ka wan ka la buh jingeh ïa ki briew ba leit ba wan kiba ïaid lyngba na ka surok NH-6 ha Khliehriat bad Ladrymbai namar ka jingpynieng kali ha rud surok ka pynkhim ïa ka surok ban ïaid ki kali bad “Kaba sngewkhia eh ka dei ka jingbym don jingsngew ki nongñiah kali ki bym don akor namar ka jing pynieng klumar ïa ki kali, kaba buh jingeh ïa kiwei kiba don ha ki kam kiba kyrkieh bad la ju lap ruh ba wat ïa ki kali kit nongpang ruh kim ailad bad kane ka buh jingma ïa ka jingim jong u/ka briew kiba don ha ki kali kit nongpang” ong u bah Lektor Dkhar.
Halor katei ka mat kaba buh jingeh ïa ki paidbah ha ka leit ka wan kiba ïaid na surok NH-6 Ladrymbai bad Khliehriat, utei u samla u kyntu ïa u Deputy Commissioner ban u dei ban shim khia ban pynmih da ka hukum kumjuh ruh ban pyntreikam thikna ïa ki kyndon bad ki aiñ ñiah kali bad ruh ban pyrkhing bha ban nym shah ban ieng kali pathar ha rud surok bad ban wanrah ruh ïa ka jinglong ryntih ha ka rukom ïaid ki kali.
Na ka bynta ka jingbit jingbiang lang jong baroh ki paidbah, utei u samla, u la ai jingmut ruh ba dei ban thoh da ka ‘No Parking’ ha ki jaka ki bym i long ban pynieng kali, ban pynkhlaiñ ïa ki bor pulit kiban pynïaid kali ba kin peit bad leh ïa kaba donkam ïa kito kiba pynkheiñ ïa ki kyndon, kumjuh ruh u kyntu ba donkam ban pynlong da ki prokram ai jingpynshai ne ki awareness prokram ïa kiba ñiah kali ba ki dei ban pyrkhat lang ïa kito kiba donkam kykieh kum ki kali kit nongpang.
