Shillong, Nailar 29: Ka Khubor ba la ïoh na ki pulit la ïathuh ba u Purushottam Sharma u la phah ka jingujor ba ha ka step jong ka 8 tarik mynta u bnai ki runar bym lah ban ithuh ki la tuh ïa ka kali Maruti Eeco van jong u kaba don u nombar ML-05-8792 napoh ka ïing sah jong u kaba ha Jhalupara, Shillong.
Ha kawei pat ka jingjia ki pulit ki la ïathuh ba u Deibormi Mukhim bad u Bah Robert Shadap ki la ujor ba ha ka janmied jong ka 8 tarik mynta u bnai ki runar bym lah ban ithuh ki la rung hapoh ka trok kaba don u nombar NL-01K-6051 kaba ha Mawryngkneng Bypass (EKH), ki la teh ïa ki dur khmat, ki la tan hapoh ka kawei ka Maruti Alto car bad hadien pat ki la ieh noh ïa ki ha Mawjrong (EKH).
Shuh shuh ha kawei pat ka jingjia ki pulit ki la ïathuh ba ha ka 10 tarik mynta u bnai ki pulit ki la ïoh jingtip ba uwei u Sharme Sten, u nongñiah ïa ka kali AS-01PC-8889 ha ryngkat bad u nongbud ki la ktah kti ïa u Bah Wanrapborlang Mawthoh ha Ïalong, Jowai (WJH).
Kham hadien na ka liang jong ki paidbah ki la bat ïa katei ka kali ha ka thaiñ Puriang bad ki la shoh ïa u Sharme Sten bad u nongbud jong u. Halor kane na ka liang jong kitei ki la mynsaw bad la rah noh sha PHC Mawryngkneng ha kaba la phah noh sha CH Shillong ban ïoh ki lad jingsumar.
