Shillong, Nailar, 29: U Symbud Myntri Rangbah ka Jylla uba khmih ïa ka tnat District Council Affairs u Bah Prestone Tynsong ha ka sngi Balang u la ong ba ka Sorkar ka dang bishar ïa ka jingtyrwa ban kyntiew ïa ka bhah sha ki lai tylli ki Autonomous District Council (ADC).
Ha ka jubaba ba la wanrah hapoh ka Ingdorbar Thawaiñ u Bah Tynsong u la ong ba ïa kane ka kam ka Sorkar ka dang bishar na ka bynta ka thungkam thungjam bad ka jingpynlong ïa ka eksamin thungkam ha ki lai tylli ki ADC khnang ban wanrah ïa ka jingtreikam kaba khuid ba suba.
Ïa mynta ka Khasi Hills Autonomous District Council (KHADC) ka don ki nongtrei haduh 818 ngut, ka Garo Hills Autonomous District Council (GHADC) ka don 1397 ngut bad ka Jaiñtia Hills Autonomous District Council (JHADC) ka don 1161 ngut.
Shuh shuh u Bah Tynsong u la ïathuh ba ki don ruh hynriew tylli ki Aiñ Rew ba la mynjur da ka KHADC kiba dang don ha ki almari jong ka tnat bad ha ka Kynhun Myntri, kawei ba la mynjur da ka GHADC bad 2 tylli da ka JHADC.
“Ka daw ka dei namarba ki don ki jingbakla ha ka Drafting, kaba ïatakhuh bad ki aiñ ka Jylla ne ki kyndon jong ka riti synshar,” u la ong.
U Symbud Myntri Rangbah u la ïathuh ba la thaw ïa ka Expert Committee ha ka 26 tarik Nailur 2023 ba la khlieh da u Secretary, DCA bad kynthup ruh ïa ki ophisar na ka tnat Aiñ bad ki ophisar na ki lai tylli ki ADC.
Kane ka Komiti kan ïatreilang na ka bynta ban khmih bniah ïa ki Aiñ Rew ban phah sha u Lat ka Jylla Meghalaya na ka bynta ba un ai ka jingmynjur, u la bynrap.
