Shillong, Nailur 24: Ka HNYF, West Jaiñtia Hills ha ka sngi Nyngkong ka la leit ban buh da ka jingujor pyrshah ïa u Public Information Officer (PIO) jong ka ophis District Health Medical Officer (DM&HO) West Jaiñtia Hills District, halor ka jingbym lah ban jubab ïa ka (RTI) ba ka seng ka la buh naduh 9/08/2024 kiba katei ka ophis ka la pdiang ïa katei ka RTI naduh katei ka sngi bad tad haduh mynta mynne na ka liang ka seng kam shym la ïoh kano kano ka jubab lyngba ki jingthoh ne kino kino ki lad jingpyntip.
Ha kaba ïadei bad kane na ka liang ka seng ka la leit buh syndon da ka jingujor (complaint) pyrshah ïa u DMHO u ba long ruh u Public Information Officer (PIO) jong katei ka ophis. Halor kane ka seng ka la dawa ruh na u Chief Information Commissioner (CIC) ban pynshitom ïa u tei u PIO katkum ki kyndon ka RTI Act 2005 bad ban tuklar ïa katei ka kam ban bthah ïa u tei u Public Information Officer (PIO) ban ai jubab ïa katei ka RTI application kaba ka seng hi ka la buh ha katei ka ophis.
