U Prestone u dei u khawpud, ka jingïoh Civil Sub Division ha Pynursla dei na u Dr Mukul: RM Shabong

Pynursla, Risaw 31: Ka jingïalang jong ka UDP Pynursla Circle ha ka sngi Nyngkong la sakhi ba ka long kaba shitrhem da ka jing0wanpoi shim bynta da ki bun spah ngut ki nongïalam na ki Primary Unit ban sakhi ïa ka jingpynskhem ïa ki nongkitkam ba thymmai ka Circle bad ka jingpdiang burom sha ka UDP ïa ki bun phew ngut ki nongïalam jong ka NPP ha ka ilekshon MLA ha u 2018.
Haba kren ha kane ka sngi u nongkyrshan ba radbah jong u Bah Prestone ha ki snem kiba la dep u Bah RM Shabong u la ong ba u MLA ka thaiñ Pynursla u Bah Prestone u long uba khaw-eit haduh katta katta bad uba da tieng hi thot thot ïa u Dr Mukul Sangma bat u pyntur ïa u nakhmat nakhmat ban pdiang ïa u Conrad ha Pynursla ha ka por ba la sdang ïa ka NPP ha Pynursla ha u snem 2017.
“U Bah Prestone u da tieng ïap ïa u Dr Mukul bad ha u 2017 ha ka por ba u la rai ban rung sha ka NPP namar u tieng ïap ïa u Mukul bad u pyntur ïa nga na khmat na khmat ban pdiang sngewbha ïa u Conrad bad dei ma nga ha kato ka por bad nga long nongpynkylla Khasi ruh ïa ka jingkren u Conrad namar u Bah Prestone um nud shim bynta namar u tieng eh ïa u Dr Mukul bad haduh ba un hap iehnoh ruh ïa ka jinglong MLA ruh”, u la ong.
U la ong ruh ba ka jingïoh ïa ka Pynursla Civil Sub-division ha u snem 2017 ka dei namar u Dr Mukul u don ka jingpyrkhat ïa ka thaiñ ym eh namar ka jingtrei shitom jong u MLA u Bah Prestone Tynsong.
U la ong ba ka jingkordit ki paidbah ha ka por ka khlam Covid ka long kaba shyrkhei haduh katta katta ha kaba ka jingbam jingdih ka bai kali ka la kiew dor lut hynrei ha kata ka por u MLA ka thaiñ u jah kyndong pynban. U la ong ruh ba ka jingpang Covid ka long kaba shyrkhei haduh katta katta bad kat ki nongsynshar kiba leh meinah ïa ki paidbah ha kane ka por ki leim lyndang beit.
“Lada phi peit ïa u Donald Trump ha America, u Capt Amrinder Singh ha Punjab namar ki leh sat ïa ki paidbah ki khyllemn syndon krim na ka khet jong ki bad kane ruh ngam ar tatien ba kan long ha Pynursla ruh”, u la ong.
Shuh shuh u la ong ruh ka jingsei ka UDP ha kane ka kynti da u Bah Anthony u nongwar paka uba duk bad u khun nongrep ka don ka jngkyrmen ban jop namar u don ka jingtip bad ka jingsngewthuh kaba shai ïa ka thaiñ ym kum kiwei pat ki kyrtong.
“Ha ki snem kiba ladep ka UDP ka khot ïakhun ilekshon da ki mahajon die kali, da ki sahep sorkar hynrei ha kane ka kynti ba mynta ka khot da u khun baduk bad u nongrep bad kum u nongrep ka jingïaleh kaba itynnad bad kaban poi ruh sha ka thong”, u la ong.
U la ong ruh ba ka jingïai jop da kita kiba phla hok ba ki pynbeit ïa ki paidbah ka Pynursla man ka san snem bad ki paidbah ruh ki nongop man ka san snem ka long ka jingkren jemdaw ïa ki nongshong shnong ka thaiñ “ban pyni ba ngim biej shuh man ka san snem bad ngim ngop ha kata ka jingpynbieit jong ki donkam ban pynjop ïa u Bah Anthony” u la kyntu ïa ki paidbah.
Shuh shuh u la ong ruh ba lada kyrtiang dien sha ki snem kiba la leit jong ka jylla dei tang ka UDP kaba ailad ïa ki MLA na kla thaiñ ban kiew sha ka kyrdan nongïalam da kaba u ai nuksa ïa u bah BB Lyngdoh, u Bah Darwin hynrei kiwei pat ki party kim ailad satia ïa u nongïalam na ka thaiñ bad bat ïa ka kyrdan nongïalam ha ka jylla.
“Hadien ka ilekshon MLA jong u 2023 ka UDP kan don ha ka sorkar bad shen ruh na ka 8 ngut ka MLA ngin ïoh sa 6 ngut kiwei pat ha kine ki khyndiat sngi ban wan”, u la bynrap.
Haba kren ha kane ka sngi u Bah Anthony Kongwang u kyrtong ka UDP u la ai ka jing kular sha ki paidbah ban peit kyrpang ïa ka jingeh ka thaiñ bad ka jingangnud kaba ka Riwar Mihngi ka don la slem bha kata ka jingdon ka Government College ha Pynursla.
“Nga kular da ka jingsngur myniem bad ka jingmut ba beit ba lada phi ai lad ha kane ka kynti mynta ka Govenrmnet College kan ïeng ha Pynursla bad ym tang ba ka shu ïeng hynrei ngan pynthikna tuh ba kan long kaba treikam pura”, u la ong.
U la ong ruh ba un peit ba ki jaka sumar kin long kiba biang bad kiba janai ym kymba ki long mynta.
“Mynta ha Pynursla CHC ka rung pynban da ka masi ha ha ka jaka ai jingsumar bad kane ka pyni ïa ka jinglong jingman jong ki jaka sumar ha ka dong ka thaiñ”, u la bynrap
Shuh shuh u la ong ba un peit ruh ïa ka jingbit jingbiang ki samla bad ka jingïohkam jong ki da kaba un wad ki lad ki lynti ban wad ïa ki briew kiba tbit ban hikai ïa ki samla ban seng ïa ki kam ki jam ryngkat ka jingkyrshan na ki bank bad ki jaka ai ram pisa.
U la ïathuh ruh ba ha ka jingïaid lynti jong u ha ka dong ka thaiñ ban wad jingkyrshan kiba bun Bah ki briew kiba pynpaw ïa ka jingangnud ban kylla noh ka saiñ hima sima bad ki kular ruh ban ai jingkyrshan na rieh narieh.
“Ka jingkylla ha ka saiñ hima sima ha ka thaiñ kan sa urlong ha u 2023 bad kiba bun Bah ki nongkyrshan NPP ki la kular ban ai jingkyrshan ha ka sngi thep vote bad kin leh mynleh ai jingkyrhshan ïa u MLA ba mynta”, u la ong.
Haba ïadei bad ka jingmih ki khubor ba u Bah Anthony la pynïeng hi da u Bah Prestone, u Bah anthony u la ong ba kane ka dei tang ka khubor lamler da ki briew shim kabu saiñ pyrthei bad kata ka jingong ruh lada ka dei kaba shisha ka pyni ba u Bah Prestone um kwah jop shuh.
“Lada ïa nga pynïeng u Bah Prestone ka pyni ba um kwah jop suh namarkata phin ïa kyrshan aiu ïa uba ym kwah jop shuh hynrei wan bad ïatreilang bad nga ba ngin ïoh ïa ka jingjop donburom”, u la ong.
“Kumba nga la kren ba nga mih ban ïakhun namar ngam ïahap bad ka Policy u MLA bad ka dei shisha ruh kumta, pyrkhat por ilekshon nga rwai La Lieh La Ïong Lyngkot ne Jrong Lah u Para War ynda khim khait na ka jingkhangdam u MLA pat u rieh pynban sha kyndong hato ngan ïahap mo kum ïa kata ka rukom treikam bad kane ruh ka dei ka jingshukor ïa u paidbah pylleiñ pylleiñ”, u la ong
Haba kren halor ka jingpyndonkam pisa na bynta ban jop ilekshon u Bah Anthony u ong ba ma u hi ban jop da ka bor ka tygka ym don spah don klur bad u la rem lupa hynrei ka jingshlur jong u ban mih sha khmat ka dei namar u ïoh ka jingieid na ki paidbah ka thaiñ
Ha kane ka sngi la ïoh ruh ïa ka jingkren na ka Kong Drosila Lamin ka MDC ba nyngkong eh ka Nongshken, ki nongïalam ka UDP seng kmie u Bah Allantry Dkhar Vice President bad kiwei kiwei ki nongïalam.
La ïoh ruh ban pynskhem da u Bah Allantry ïa ki nongkitkam ïa u Bah Aihok Khongmalai kum u President bad kiwei pat ki nongïalam jong ka Circle.