Shillong, Risaw, 31: Ki nonghikai kiba la shah weng kam ha u snem 2014 bad ha u snem 2019 ki la pynlong da ka jingïashong kyllaiñ myngngor kaba shi sngi ha phyllaw ka ophis treikam jong ka Meghalaya Board of School Education (MBoSE), Shillong ban pynsngew sha ki tyndong skhor ka Sorkar Jylla ban dawa thungkam biang ïa ki.
U Bah Benedic Buam uwei na nonghikai uba la ngat ha ka jingshah weng kam ha ka jingïakren bad u nongthoh khubor u la ong, ki nonghikai kiba la ïashim bynta ha ka jingïakhih ki dei na ka kynhun jong u snem 2010 bad kiba la shah weng kam ha u snem 2014.
Ki nonghikai kiba la shah wengkam ki don 246 ngut bad na kine kiba la shah thungkam biang ki don 65 ngut bad 157 ngut ki bym pat shah thungkam.
Kiba la shah weng kam ha u snem 2019 ki don 260 ngut. Na kine, kiba la shah thungkam biang pat ki long 187 ngut katba kiwei pat ki dei kiba la shah weng kam.
Kaba kham pynkthang shuh shuh ïa ki kum ki nonghikai kiba la shah wengkam ka long halor ka jingpynmih jong ka Sorkar Jylla ïa ka hukum ha ka 18 tarik, Naitung, 2022 ba ïa ki 157 ngut ki nonghikai la shah ai dak sniew kin ym lah shuh ban wad kam Sorkar nangne sha khmat.
U Bah Buam u la ong shuh shuh nalor ba la shah wengkam bad nalor ba la khang ba kin wad kam Sorkar shawei, ka tnad Pule Puthi ka la daiñ kuna ruh ïa ki 157 ngut ki nonghikai ha kaba ki la hap ban siew T.50, 000 hajar marwei sha ka State Disaster Management Fund (SDMF) hapoh ka 30 sngi naduh ba la pynmih ïa ka hukum.
U la ong ba kaei kaba la jia baroh kam dei ka jingbakla jong ki. Kane ka jingshah khanglad ban wad kam shawei bad ka jingshah daiñ kuna kaba T.50,000 hajar tyngka marwei ïa ki 157 ngut ki nonghikai ka la pynkthang mynsiem ïa ki haduh katta katta bad kane ka jingïakhih mynta ka sngi ka long ba kin pynsngew sha ka Sorkar ïa kane ka jingeh ka jong ki.
Ki la ong, lada ka Sorkar kam sngap kim banse ban ïaid da kawei pat ka lynti.
