10sngi ai por ki nongshet ja sngi ha ki skul lada ka sorkar kam kyntiew jingsiew

0

Shillong, Risaw 31 : Ka kynhun ki nongshet ja sngi ha ki skul ha ka sngi Nyngkong ki la byrngem ba kin mih madan sha surok lada ka sorkar jylla kam lah ban kyntiew noh ïa ka jingsiew kaba ki dawa hapoh ka 10 sngi.
Ïa kane ka rai la shim ha ka jingïalang ba la pynlong da ka All Jaintia Midday Meal Worker’s Union bad ruh da ka All Meghalaya Midday Meal workers (AMMMW) kaba long ha Madan Iewrynghep (Fire brigade), hynne ka sngi.
Kitei ki nongshet ja sngi ki la dawa ruh na ka sorkar ba kan kyntiew ïa ka bhah jong ka sorkar jylla man u bnai sha ka 2000 tyngka na ka 100 tyngka bad ruh ban pyllait noh ïa ka bai bnai kaba la sahteng la lai bnai mynta.
Haba kren bad ki lad pathai khubor, u nongai buit ka kynhun, Bah KL Pariat u la ong ba katkum ka jingtip ba ki ïohlum, ka sorkar jylla ka la thmu ban rah noh ïa ki mat jingdawa ba ki buh ha ka jingïalang jong ka kynhun Myntri kaban sa long shen.
“Kumta, ngi la rai ban ai por ïa ka sorkar haduh ka 10tarik Naiwieng ban rah ïa ki mat jingdawa jong ki lym kumta ngim banse ban mih shna surok ha Shillong,” ong u Bah Pariat. Katkum ka jingong jong u, ki nongshetja sngi ha ka jylla ki ïoh ïa ka jingsiew kaba long tang 100 tyngka na ka bhah jong ka sorkar jylla naduh u snem 2002 bad kane ka neh haduh mynta.
“Ngi la bteng ban dawa kyntiew ïa kane ka jingsiew na ka por sha ka por hynrei ka la poi ha ki shkor ba kyllut,” u la ong. Shuh shuh u la pynpaw ruh ba ka sorkar ka la dei ban pyllait noh ïa ka jingsiew kaba sahteng na ka bynta u Naitung, u Nailar bad ruh jong u Nailur mynta u snem.

Leave A Reply

Your email address will not be published.