Da ka Distrik kwah ki nong Sohra ban ïoh shwa ka Khristmas ong u Bah Allan West por rung NPP

Shillong, Risaw 31 : U kyrtong ka NPP na Sohra, Bah Allan West Kharkongor ha ka sngi Nyngkong u la kyntu ïa u Myntri Rangbah ka Jylla bad Symbud Myntri Rangbah ka jylla ba kan ai sngewbha Kristmas ïa ki paidbah ka thaiñ Sohra da ka distrik.
“Ki nong Sohra ki khmih lynti mynta ban ïoh jingai sngewbha Kristmas da ka Distrik,” u la ong da kaba pynpaw ka jingngewkmen halor ka jingshimkhia jong kane ka sorkar hadien ba kum ka Forum ki la pynkynmaw biang ïa ka jingthrang jong ka thaiñ Sohra ban kyntiew kyrdan distrik noh ïa ka Sohra Civil Sub-Division.
Haba kren ha ka jingïalang hadien ba la dep ban pynbna ïa u kum u kyrtong ryngkat ka jingdonlang u National President Conrad K Sangma bad National Vice President Bah Prestone Tynsong, u Bah Allan u la ong ruh ba u ïohi ba kane ka sorkar ka la lah ban pynurlong ïa bun ki kam. Kumta u ïohi ba ïa ka ishu distrik jongka Sohra ruh um ïohi ba kan dei ka jingeh.
Ha kawei pat ka liang, u Bah Allan u la ong ba ha kane ka juk kyrduh kam mynta, ki samla kim dei shuh ban pyrkhat ïa ka kam sorkar hynrei ban long ki nongseng kam bad kylla ki nongai kam. “Nga marwei nga lah ban ai 20ngut ki samla Khasi bad kumta lada baroh ki leh kumta, kan sa poi ka por ba ngim donkam ban leit wad kam sorkar shuh,” u la bynrap shuh shuh.
Lah ban kdew hangne, u Bah Allan u dei uwei na ki nongmaitphang na ka bynta ban kyntiew ïa ki kam jngohkai pyrthei ha ka jylla bad khamtam eh ha ka thaiñ Sohra.