U Pala u la shu kren kulmar,kren biej, kren laplah bad kynnoh khlem nongrim : Sniawbhalang

Shillong, Nailar 23 : U National General Secretary jongka NPP uba dei ruh u Symbud Myntri Rangbah ka jylla u ma Sniawbhalang Dhar u la khyrwit kylla ïa u Nongïalam ka Meghalaya Pradesh Congress Committee (MPCC) u ma Vincent H Pala da kaba ong ba u sngewsynei bad sngewdiaw ba kat u nongïalam ka Congress bad u MP Lok Sabha laisien lai wat na ka jylla u dang kren kulmar, kren khyllung, kren biej, kren laplah bad kynnoh khlem nongrim ïa u ba u long u nongpathai khubor ka BJP bad RSS, shwa ba un kynnoh ïa kiwei u la dei ban bishar shwa ïa lade balei um lah ban synshar ïa la ka ïing ka sem ba naduh ba u shimti kum u President mynta la phet lut ki MLA ka Congress.
Haba pynphai nia ïa u ma Pala u ma Sniawbha ula ong “ Baroh ki tip shai ba ki jingkynnoh jongu ïa nga ki long ki bym shisha bad ki bym don nongrim haei haei ruh bad ki long ruh kiba bakla. “ Nga dei u National General Secretary ka NPP kumta kumno un shu kynnoh ba nga dei u BJP bad RSS? Hooid kum ka sorkar ngi ïatrei lang bad ka BJP mynta la hynniew snem namar ngi kwah ban ïoh jingroi jingpar ha ka jylla. Namar ka jylla Meghalaya ka dei ka jylla kaba rit kaba ym lah ban kyrshan da lade ïalade lada ym ïoh jingïarap na ka sorkar pdeng bad ngi donkam ïa ka jingïarap na ka sorkar pdeng na kata ka daw ngi ïatrei lang namar ha Delhi ïa ka jingsynshar la ïalam da ka BJP. Kata ka dei ka daw ba ka MDA ka ïatrei lang, kam mut ba ngi ïadon bad ka BJP bad ngi long ki nongpathai khubor ka BJP bad RSS. Kane ka long kaba bakla bad ka jingkynnoh ka bym don nongrim haei haei ruh” ong u ma Sniawbhalang haba ïakren bad ki nongthoh khubor.
“ Nga ju burom bha ïa u ma Pala kum u nongïalam bad kum uta u MP barim bad kum u President ka MPCC. Ngam ju poi pyrkhat satia ba kat ka kyrdan jongu ban kren kum kine ki kyntien bym don nongrim bad kren mata madei kat shaba lap ba shem kiba long kum ka jingkren khyllung” ong u ma Sniawbha.
U la ong shuh shuh “ U Pala u tip shai ba ka long ïing jong nga ka dei kaba trei kam lajong (Business) sa rung sha ka kam saiñ pyrthei ne politik ym dei ba rung shwa na ka politik sa trei kam business”. Baroh ki ïatip ba ngi don ka kompani ban trei ïa ki kam ba bun kumta ki jingkynnoh ba trei beaiñ ne kynnoh ba don kti ïa khaïi drok ka sorkar ki long ki bym shisha bad bym don nongrim satia”
U ma Sniawbha ula kyntu ïa u ma Pala ban bishar bniah shwa ïa lade da kaba ong ruh “ Mar ïa shimti ma u kum u President ka MPCC phet haduh 12 ngut ki MLA ka Congress bad leit pynïasoh sha ka TMC. Hato ïa kane ruh phin kynnoh ïa u Sniawbhalang. Hadien kane wan ka election MLA 2023 wan pynïasoh sa ka NPP sa ka Dr Ampareen Lyngdoh, Kimfa Marbaniang bad bah Mohendro Rapsang, bah P.T Sawkmie bad bah Mayralborn Syiem sha ka UDP, hato ïa kane ruh phin kynnoh ba leh u Sniawbhalang?”
“ Kane ka pyni shai kdar ba u (Pala) um lah ban synshar bad sumar ïa la ka ïing ka sem. Bad dang shen lai ngut ki MLA ka Congress ka la wan pynïasoh sha ka NPP namar ki kwah ban ïoh jingmyntoi ki constituency jongki. Kumta u Pala u dei ban bishar bniah bad wad bniah don kaei ka jingbakla ha ka ïing ka sem jongu. Ban shu kynnoh ïa ka NPP tang na ka daw ba wan pynïasoh ki MLA ka Congress kam long kaba bha namar ngi te ngi kloi ban pdiang sngewbha ïa kino kino kiba kwah ban pynïasoh bad ngi” ong biang u ma Sniawbhalang.
U ma Sniawbha u la ong ba u Pala u dei ban sei bad ki jingshisha haba u kynnoh ba ka Dhar Company ka leh ïa ki kam beaiñ. “ Ban kynnoh ba ka Company jong nga ka don ha ka jingpeitngor jongka CBI ka long ka bym shisha namar kam don kaei kaei ruh kum kata. Sngewsih ban ong ba kat u MP ba rim un kynnoh ba ka sorkar ka donkti ban khaïi drok haba u ïohi ba ka sorkar ka trei shitom ban rat dyngkong ïa u drok na ka jylla ha ka jingshisha kum u nongïalam u la dei ban ïatrei lang na ka bynta ka bha ka miat ka imlang sahlang hynrei u kren laplah ban ïalam bakla pynban ïa ki paidbah. Ban shu kynnoh khlem nongrim ka long ka bym lah ban pdiang da lei lei ruh” pynkut u ma Sniawbha.