Shillong, Rymphang 19 : U nongïalam ba rangbah ka BJP na Assam ba dei ruh u Myntri Rangbah ka Assam, u Himanta Biswa Sarma ha ka sngi U Blei u la ong ba u Myntri Rangbah ba thymmai ka Meghalaya un dei noh na ka Bharatiya Janata Party.
“U Myntri Rangbah un dei noh na ka BJP,” u la ong haba kren bad ki lad pathai khubor halor ka jingkylli la ka BJP kan ïatrei lang neem bad ka NPP hadien ba la dep pynbna ïa ka result elekshon.
Hynrei halor kane, u la ong ba ka shong ha ki paidbah jong ka Meghalaya ban ai ïa ka rai bad leh ïa kaba dei pyrshah ïa ki kam bamsap jong ka sorkar MDA.
“Phi ïohi, ngi la wan sha ka rai bishar jong ki paidbah bad ka shong mynta ha ki paidbah ka Meghalaya ban shim ïa ka rai ym ka sorkar pdeng. Kidei ki paidbah ban leh ïa ka kam kumba ka jingsynshar laitluid ka dei kumta ïa ki paidbah,” u la ong.
Halor ka jingong pat jong u Myntri Rangbah ba ka jingkynnoh ka BJP kadei tang ka jingkren elekshon, u Myntri Rangbah ka Assam u la ban biang, “Phi ïohi kaei kaba ngi mut ban ong ka long ba ka sorkar pdeng ka la mang pisa na ka bynta bun ki projek kum ka jingtrei na ka bynta ki medical college ha Tura, Shillong bad shawei shawei. Kumta ngi kwah ban ïohi ba kine kin ieng. Lada kim long kumta, kadei ïa ka sorkar Meghalaya ban ai ka jubab balei kam long kumta.”
Shuh shuh u ong ruh ba kim shym la kynthoh lut hynrei ki shu kylli shaei ka pisa ka leit. “Kumta sngewbha jubab shaei ka medical college ka jah, shu jubab tang kata,” u la bynrap biang.
Haba kren pat halor ka nongrim jong ka party haba ïadei bad ka jingpynkylla niam, u Myntri Rangbah ka Assam u la ong ba ka sorkar jong u ka la dep ban pynshai ba ka shithi kaba ïadei bad ki ïingmane ha Assam kidei ki shithi thok.
“Ïa katei ka shithi ym shym la pynmih da ka sorkar Assam. Kadei ka shithi ban pynthoh bria. Ka nongrim jongnga ka long kaba shai ba ha Assam baroh ki jait niam ki im laitluid, kumta kumjuh kane kan long ha Meghalaya ruh,” u la ong da kaba kam ba ka Assam mynta kadei ka jylla kaba shongsuk tam ha India.
