Ka Sorkar ka tem ïa ki jingkulmar da ki jingjaijai ym da ka jingthombor bad u kuli: MR

0

Shillong, Rymphang 19 : U Myntri Rangbah ka jylla, uba dei artad u National President jong ka National People’s Party (NPP), u Conrad Sangma u la ong ba bun ki briew ki pyrkhat ba u long uba rit mynsiem ha kaba ïadei bad ka jingpynïaid ïa ka aiñ ka kanun.
U Conrad Sangma u la ong ba ha kine ki 5 snem, ka sorkar jong u ka la shimkhia bha haba mih kano kano ka jingkulmar ban peit ïa ka suk ka saiñ kan wanphai bad ïaineh da kaba tem da kaba jai jai ym da ka jingthom bor bad pyndonkam da ki kuli khnang ba kan nym don kano kano ka jingjia kaba sngewsih.
“Lada ngi kwah ngi lah ban pyndonkam da kiba bun ki kyndon aiñ hynrei em ngim kwah satia ban pyndonkam da ki bor pahara bad ki bor ka ain kumba leh kiwei ki sorkar kiba rim ban dkhat ia ki jingim briew ruh. Ngi haba mih kino kino ki jingkulmar ngi tem da kaba jai jai da kaba iakren sngewthuh khnang ban wanphai biang ka shongsuk shongsain khlem kano kano ka jingjia ba sngewsih. Lada ngi kwah, ki lah ban ai hukum ban siat, hynrei ngi lah ban pynjaijai da kaba leh kumne?,” ong u Conrad Sangma ha ka jingleit ialap elekshon na ka bynta ka kyrtong jong ka NPP na Nongthymmai, ka kong Jasmine Lyngdoh.
U Myntri Rangbah u la pyntip ba ki la don ki por ba mih ki jingkulmar, la phah ïa u ban wanrah noh da ki shipai ban pynthynda hynrei u shim da ki lynti kiba jaijai na ka bynta ka jingsuk.
“Ka don ka jingïapher hapdeng ka jingjaijai bad ka jingtlot. Lada phi pyrkhat ba ka jingsiat ka long ka jingkhlaiñ? baroh lah ban leh, hynrei em kam long kumta” u la ong.
U la ong ruh ba lada don ka jingkulmar kaba la palat, bad lada aibor ïa ki pulit ban siat, kin don ki jingduh ïa ki mynsiem briew bad hadien, kam don jingsuk shuh bad kan don ka jingsngewsih kaba khraw.
U Conrad Sangma u la ong ba ka lad ban pynjaijai kam long kaba suk, hynrei kadei tang da ka jingshaniah bad ka jingïatreilang ki paidbah ba baroh kiei kiei ki la long kiba jaijai.
“Na ka bynta kine, donkam ïa ka sorkar kaba khlaiñ bad kaba sngewthuh,bad ban wanrah ïa kata ka jingsynshar ba khlaiñ kaba ïatrei lang bad sngap lang ïa ki paidbah ka dei tang ka NPP ” Pynkut u Myntri Rangbah.

Leave A Reply

Your email address will not be published.