Ngin plie nyngkong eh ïa ka MCCL lada ka BJP ka wan ha ka bor ha Shella: John Barla
Shillong, Rymphang, 19: U Myntri ka Sorkar Pdeng uba khmih ïa ka tnad Minority Affairs u John Barla ha ka sngi Saitjaiñ u la leit jngoh ïa ka karkhana Mawmluh Cherra Cement Limited (MCCL) kaba la khang khyrdep haduh mynta kaba don ha ka thaiñ Sohra.
U Barla u la leit jngoh ïa kane ka karkhana pynmih dewbilat hashwa ban hiar sha ka shnong Nongthymmai kaba hap hapoh ka Elaka Mawsmai ban ïalap elekshon na ka bynta ka kyrtong jong ka BJP ka Kong Arena Hynñiewta kaba ïakhun na Shella Constituency.
Haba kren ha ka jingïalang u John Barla u la pynpaw ba ka thong ba hakhmat duh jong ka BJP ka long lada ki paidbah jong ka Shella Constituency ki jied ïa ka BJP ha kane ka kynti ma u bad ka Kong Arena Hynñiewta kin shimkhia ban plie biang ïa ka karkhana MCCL kaba long ka pliangja jong ki paidbah ba bun jong ka shnong Sohra.
U la ai ruh ka jingkular ban pynïoh ïa ka surok kaba bha kaba la jot rathai naduh Majai ter ter shaduh sha Shella, ki skul kiba biang hapoh ka Constituency, ka koit ka khiah kaba paka, ka khaii ka pateng lyngba ki marpoh khyndew kiba don ha kane ka thaiñ bad ruh ban pynïoh ïa ka Stadium ïalehkai kaba paka ha kane ka thaiñ.
U la pynpaw ruh ba kum u Khristan um shym la sakhi ïa ka jingpeit shiliang ne ka jingñioñ beiñ jong ka Sorkar BJP ïa ki ritpaid hapoh ka jingïalam bastad jong u Myntri Rangbahduh ka ri Narendra Modi bad bynrap ruh ba kum u Khristan uba wan na ka longiing baduk, dei u Narendra Modi uba la pynshong shuki ïa u kum u Myntri ka Sorkar India ban trei na ka bynta ka bha ka miat jong ki paidbah.
Shuh shuh u la ong ba kum u Khristan u sngewthuh ba dei tang lyngba ka jingïasnoh ha ka saiñpyrthei kaba pynlong ïa u briew ban pynpoi ïa ki hok jong u paidbah bad kaba la pynlong ïa u ban shim ïa ka sienjam ban rung sha ka jylli jong ka saiñpyrthei.
U la kular ruh ba ka Sorkar Pdeng kan nang ïai theh shuh shuh ïa ki song pynroi sha ki paidbah jong ka jylla Meghalaya kumba ka leh haduh mynta khamtam lada ka BJP kan ïoh bat ïa u lakam synshar ha kane ka jylla.
Ka kyrtong jong ka BJP ka Kong Arena ka la pynpaw ba ka jingmih shakhmat ban pan jingkyrshan na ki paidbah ban pynkupbor ïa ka, ka long halor ka nongrim ba kam lah satia ban shu peit ïa ki jingshem jingeh jong ki duk ki suk ha ka thaiñ khamtam ha ka por ba ka khlam jingpang COVID-19 ka la wan lynshop ha kane ka jylla kat haduh ba ka la pynsuhsat ïa kiba bun ki longiing bad pynlong ruh ïa ka ban kner la ki kti katba ka lah ban pynpoi ïa ki lad jingïarap.
Ka la pynpaw ruh ba dei ki paidbah hi kiba la ai mynsiem ïa ka ban ïakhun ïa ka elekshon ha une u snem 2023 bad ong ruh ba kan ieng ha ka nongrim jong u paidbah.
Haba pynpaw ba kam dei shuh ka riewthymmai ban rung sha ka jylli jong ka saiñpyrthei, ka Kong Arena ka la ong, “da ki phew snem nga la thep ïa la ka vote, da ka jingkhmihlynti ban ïohi ïa ka jingkylla hynrei phewse bun tang ka khaii pateng ki hehspah ym ka jingkiew ka thaiñ, kaba pynlong ïa ka Shella Constituency ban sahdien haduh mynta.”
Ka la kyrpad ïa ki paidbah nongthep vote ba kim dei ban shim kumba ïoh bainong hynrei ki dei ban shim kum ka kam ïap kam im na ka bynta ki pateng ki ban sa wan.
Ka Kong Arena ka la kyntu ïa ki paidbah ban ai ka jingkyrshan ïa ka ha kane ka kynti bad buh thong ban pyni da ki kam, ym da ki jingkular kai ha ki rynsan ïalap elekshon tang ban khring ïa ki vote.
Ha kane ka sngi, ki nongkren ki kynthup ïa u Bah T.S Giri, u President jong ka Shella Mandal u Bah Bahra Buhphang, u Vicky Marbaniang na pynurla, u Sordar jong ka shnong bad kiwei kiwei