Shillong, Rymphang 19: U Myntri Rangbah ka Jylla, u Conrad Kongal Sangma u la ong ba ki paidbah ha khappud ki bitar ïa ka jingkren jong ki nongïalam ka All India Trinamool Congress (AITC) kiba kular ia ki paidbah ba kin pyndam noh ïa ka soskular Meomorandum of Understanding (MoU) ba la ïasoi na ka bynta ban pynbeit ïa ki 6 tylli ki jaka ha khappud bad ka Assam.
“Ha ka sngi Saitjaiñ nga la poi ha ki katto katne ki jaka ba ïakajia pud bad nga ïohsngew ïa ka jingbitar jong ki paidbah ïa ka TMC namar ka jingkren pyrshah ïa ka Sorkar bad ia NPP kaba pyrshang ban pynbeit ïa u pud u sam,” la ong u Conrad da kaba bynrap ruh ba ki paidbah ki shim ba ka TMC ka mut ban buh biang ïa ki ha ka jingeh. U la ong shuh shuh, “Kaba sngewsih ban iohnsngew ïa ka jingkren ka TMC, namar kijuh ki briew ki khlem leh eiei ban pynbeit ïa u pud u sam ha ka por ba ki don ha ka Sorkar ne ha ka Congress bun snem mynshwa, mynta haba la sdang ban pynbeit bad la lah ban pynbeit haduh 6 tylli ki jaka ba ïakajia bad tang namar ba ki kwah ban pynkylla ishu politic ki mut ban knieh ïa ka hok ki paidbah ban shong suk ha ki jaka khappud.”
Ha kaba ïadei bad ka jingbuh ka UDP hapoh ka kular election ne ‘manifesto’ ba kan pyndam ïa ka soskular (MoU), u Conrad uba dei ruh u national president ka NPP u la ong ba ka long kaba sngewsih ban ïohi ba ka party kaba don bynta lang ha ki jingïakren bad ha ki committee ban pynbeit pud mynta kum kine ki nongïalam ki pynkylla issue politics.
