Kob u Bah Hek ban tei da ka Taj Mahal da ki 240 klur ba thmu pynlut ka sorkar ha Khyndailad

Shillong, Rymphang 19 : U Nongïalam ka BJP bad u Myntri barim ka sorkar jylla, Bah AL Hek u la ong ba u lah ban pynieng da ka Taj Mahal da ka 240 klur tyngka, ka pisa kaba ka sorkar MDA ka tyrwa na ka bynta ban pynieng da ka jingtei ha ka jaka kaba 50,000 sq/ft ha Khyndailad.
Haba kren bad ki lad pathai khubor, u Bah Hek u la ong ruh ba dei tang ma u ba buh jingkylli ha ka kynhun Myntri halor ka jingthmu jong ka sorkar ban pynlut bun ka pisa haba ïadei bad katei ka jaka kaba rit.
“U biej aiu uban ngeit ba ngi lah ban pynlut haduh kattei naba 240 klur tyngka ka pisa kam dei shuh kaba khyndiat. Ngi lah ban tei ïa ka Taj Mahal da katei ka 240 klur tyngka ym ka convention centre da katei ka pisa,” u la ong.
“Nga da lyngoh, nga ruh nga don la ka kam kamai bad nga sngewthuh kumno kin pynlut ïa ka 240 klur ha ka jaka ba heh shi akar,” u la ong.
Shuh shuh, utei u heh BJP u la kynnoh ruh ba ka sorkar MDA ba ïalam da ka NPP ka la pyniaid ïa ka kam high level ha ka jylla.
U Bah Hek haba jubab halor ka jingkylli u ong ruh ba ka BJP kam shym la don kano kano ka jingïateh lok lypa bad kano kano ka party.
“Ka jingïakren hadien ka elekshon kan long bad ki party kiba ïahap jingmut ban pyntikna ban lait na ka jingbamsap,” u la ong.
Ha kawei pat ka liang haba jubab halor ka jingmih ki khubor b au Dr. Mukul u lah ban pynïasoh sha ka BJP bad phet noh na ka AITC, na ka liang u Bah Hek u ong ba ka jingkhang ka plie bad ki kloi ban trei bad kino kino ki party ban ïoh ïa ka sorkar kaba lait bamsap.