Shillong, Nohprah 18 : Ka Khasi Student Union (KSU) hynne ka sngi ka la kynmaw burom ïa u Khrawpyrkhat ka Jaidbynriew, u Myllum Soso Tham da kaba leit buh syntiew ha ka shnong Saitsohpen kaba dei ka jaka ba la kha ïa u.
Ha kane kajuh ka sngi, ka Seng ka la pynlong ruh da ka prokram ba lyngkot ha phyllaw jong ka skulbah NEHU ban kynmaw burom ïa ka lyngkhuh sngi ïap ba 83 jong utei u Myllung ka Jaidbynriew.
Haba kren ha katei ka jingïalang, u Vice President ka KSU, samla Biangbor Paliar u la ong ba watla u Soso Tham u la kynduh bun ki jingeh ha ka jingim hynrei um ju randien pynban u la lah ban noh synniang shibun bha ïa ka imlang sahlang lyngba ka thoh ka tar.
U la ong ruh ba u Soso Tham lyngba ki jingthoh jong u, u la dep maham lpa ïa ka imlang sahlang ïa bun ki jingma kiba ap khamtam haba ïadei bad ka jingrung kyrthlep ki mynder bad ïa ki polisi bapher bapher jong ka sorkar bad mynta ka shong sa ha iwei pa iwei ban bud ïa kai dienjat jong u ban ïada ïa ka lawei jong ka Jaidbynriew.
Shuh shuh u la ong haba ïadei bad ka jingdawa ban ithuh noh ïa ka ktien Khasi ha ka Khyrnit kaba Phra, ka sorkar kam shym la shimkhia ban pynbor ïa ka sorkar pdeng. “Ngi la ïohi ïa ka Resolution ba la mynjur ha ka Iing Dorbar hynrei haduh mynta kam don kano kano kaba thymmai haba ïadei bad ka jingdawa ithuh noh ïa ka Ktien Khasi ha ka Khyrnit kaba Phra jong ka Riti Synshar jong ka Ri. Ngi kwah ban kylli ïa ka sorkar jylla kaei kaba la jia mynta ïa katei ka Resolution,” u la ong.
U Paliar u la ong ruh ba ka Union kan ïai bteng ban buddien ban kyntu ïa ka sorkar jylla ba kan ïai tynruh ïa ka sorkar pdeng ba kan pynurlong bad ai jingithuh noh ïa ka Ktien Khasi ha ka Khyrnit kaba Phra jong ka Riti Synshar jong ka Ri.
