U DC bad SP ka EJHD ki dkhot ka MSPCB kim don bynta ei ei ha ka Fact Finding Committee: KSU

Shillong, Nailur 8: Ka Sorkar jylla kumba kala kular ha ki nongïalam jong ka KSU ha ka 26 tarik u Nailar, mynta kala pyniaid shaid shaid ïa ki kam bad sdang ban pynurlong ïa ki mat jingdawa jong ka Khasi Student Union (KSU) halor ki san tylli ki mat jingdawa.
Ha ka jingialang ba la khot ka sorkar lyngba u Chief Secretary ïa ki dkhot jong ka KSU kaba la long mynta sngi Ba-ar kadei ban buddien ïa ki kular ba la khlei ha ka 26 tarik u Nailar.
Haba kren bad ki lad pathai khubor u Samla Pynshai Rani uba dei u Assistant General Secretary ka KSU seng kmie u la ong, ha kaba ïadei bad ka public hearing kaba la long ha Elaka Nongkhlieh na ka liang jong ka Sorkar kala thaw ïa ka Fact Finding Committee.
“Na ka liang jong ka sorkar kala kular ha khmat jong ngi ba ïa u SP bad DC jong ka East Jaintia Hills District bad ïa ki Dkhot jong ka Meghalaya State Polution Control Board kin ym don bynta ha kaneka Fact Finding Committee khang ba kane ka committee ka long kaba khuid bad kaba ïaid beit ryntih” ong u samla Pynshai.
U Samla Pynshai u la ong, “Halor ka MRSSA ka sorkar kala shim khia ha kaba ha ka 9 tarik u Nailur (mynta ka sngi) kan don ka jingialang ha kaba ïadei bad ki Entry bad Exit Point ha Umling bad kila khot ruh ïa ki nongïalam jong ka KSU North Khasi Hills Unit bad kan ruh ruh ka joint inspection ha kaba ïadei bad katei ka jaka ha Umling”.
Shuh shuh u la pynsngew ruh hadien kane ka seng kan sa buddien biang ha kaba ïadei bad ka Entry bad Exit Point ha Ratachera, East Jaintia Hills.
Halor ka Work Men Act 2020, u samla Pynshai u la pyntip ba ka sorkar kala batai sha ki nongialam ka KSU ha ka 9 tarik Nailar (mynta ka sngi) kan don ka jinghikai ïa ki ophisar ki ban peit ïa katei ka tnad khang ba jingpyntrei kam ïa kane ka aiñ kan ïaid beit ïaid ryntih.
Halor ka thung kam thung jam ban pynduh ïa ka personal interview u samla Pynshai u la ong ba ka sorkar kala ai ka jingpynbna ba ka personal interview ïa ka group D kan ym don shuh ïa ki samla thep kam thep jam bad ha kaba ïadei bad ka group C bad B kan dang khmih bniah bad ïa kane ruh ka sorkar kan sap hah sha ngi ïa ka jingpynbna.
U samla Pynshai u la ong ruh halor ka mat jingdawa ha NEIGHRIMS ka seng kala dawa na ka sorkar ka kam dei pat dei ban pyniaid sha khmat katba ka jingïakren hapdeng ka KSU bad ka sorkar kam pat biang.