To ngin ïa peit la ki pulit kin leh eiei ne em pyrshah ïa kito ki briew kiba khanglad ïa ka Jingpynsngew Paidbah: Donald
Kynnoh ka KSU ba leh shilliang ka tnad Pulit
Shillong, Nailur 8: Ka Khasi Students’ Union (KSU) ha ka sngi Ba-ar ka la kynnoh ba ka don ka jingleh shiliang khmat jong ki pulit hadien ka jingshah thombor ha ka por ba ki pynlong ïa ka black flag bike rally ha ka 19 tarik u Nailar.
U General Secretary ba rim ka KSU u bah Donald V Thabah u la ong ba bun ki nongialam bad ki dkhot jong ka Union ki la shah ai notis bad shah kem naphang.
“Bun ba la shah ai notice.Arngut ki dkhot ka KSU ki la shah ai notice ha kaba ïadei bad ka jingtei beain ha ka ophis treikam jong ka CBI ha Shillong.Hadien ba la shah khot hajir ïa ki na ka bynta katei ka case, la kem ïa ki na ka bynta kawei pat ka case.Uwei na ki la pyllait noh namar ba um don bynta ha katei ka rally.Kumta ngi sngew ba ka don ka jingduna hapoh ka tnad pulit bad kane ka long kaba sngew shah shiliang khmat ha kaba ïadei bad ka jingkem naphang,” kynnoh u Bah Thabah.
Haba kylli ïa ka jingbym leh eiei jong ki pulit pyrshah ïa kito kiba la kynnoh ba ki la khanglad ïa ka public hearing jong ka Shree Cement ha East Jaiñtia Hills, u la ong, “Lada ki lah ban kem ïa ngi, balei kim lah ban kem ïa kito kiba donkti ban khanglad ïa ka public hearing jong ka Shree Cement, kum kito ki briew kiba kawang maw bad kito ki briew kiba tih ïa ka surok ha khmat ki pulit bad ki bor pyniaid District.”
U la pyntip ba ka KSU East Jaiñtia Hills unit bad ki nongshong shnong ka Elaka Nongkhlieh ki la ujor da ka ejahar sha ka Crime Branch hadien ba ka Union ka ai por 3 sngi kaba la kut mynta ka sngi Ba-ar.
“To ngin ïa peit la ki pulit kin leh eiei ne em pyrshah ïa kito ki briew kiba khanglad ïa ka public hearing”, la ong u Bah Thabah.
U la bynrap ba kum kine ki jingkem kin ym pyntieng ïa ka seng ban bud ïa ki kam jong ka.
Haduh ynta ki don san ngut ki nongialam ka KSU kiba la shah kem, kynthup ïa u President u samla Raymond Kharjana, u Vice President u samla Pynkmenlang Sanmiet bad u General Secretary u samla Reuben Najiar ha kaba ïa dei bad ka jingjia kaba la jia ha ka 19 tarik u Nailar ha kaba la thang ar tylli ki kali, 31 tylli ki kali la pynjulor bad 18 ngut ki briew ki la shah thombor.