Twa ka muri um ha ka surok Markasa sha Mawphanlur, kynnoh ba trei torti u Contractor

Nongstoiñ, Nailur 14: Ka surok na Markasa sha Mawphanlur ka dei kaba kongsan bha, namar ka shnong Mawphanlur ka dei ka jaka kaba itynnad bha bad ka dei ruh ka jaka jngohkai kaba ki nong shangkai suwari na kylleng ki jylla bad ruh wat kiba na shabar ka ri India ruh ki tuid ban leit shangkai, hynrei katei ka surok ha kine ki sngi ka la sdang sniew ha kaba bun ki jaka ka rong ka la khoh lut bad ka jingkynnoh ka leit mynta sha u contractor u ba trei torti ha ka por ba u siang rong.
Ka jingtrei torti kam dei tang ha kaba siang rong hynrei wat ïa ki muri ruh ka rukom thep hume pipe ruh, u kontraktor u phah thep tang na sharud baroh arliang tang ba ki ophisar kiba wan peit kin pass ïa ka bill, katba napdeng pat um shym thep hume pipe.
Ïa ka jingbym thep hume pipe la lap na ka jingpei thliew jong katei ka surok ha khlieh shnong Markasa, namar ka jingpei thliew ka dei na ka jingbam ka um ïa ka khyndew bad ka surok ka la nang stang katba nang slem haduh ba la pei syndon da ka thliew kaba heh.
U bah Bony Lyngdoh u nongpeit ïa ka Mawphanlur Tourist spot haba ïakren bad u nongthoh khubor, u la ong ba ka jingsdang sniew bad khohruh khohram jong katei ka surok, ka pynngiah ïa ki nongwan jngoh kai bad lada ka sorkar kam maramot noh kloi, khlem artatien ki nongwan shangkai suwari sha Mawphanlur kin ym wan shuh kumba long ha Nongkhnum.
U la ong ruh ba ha ki snem ba mynshuwa ka jingtuid jong ki nong leit jngohkai sha Nongkhnum ka la jur bha. Hynrei tang na ka daw jong ka jingsniew noh ka surok ha kine ki snem ym ju kham don shuh ki nongleit jngohkai haduh ba ka Nongkhnum ka la kynjah jar. Ym slem shuh kane kan sa long ha Mawphanlur kumjuh.
U la ong ruh ba ka dei ka jingshisha ba lada ka sorkar kan pynbha bad maramot ïa katei ka surok lada ki nongwan jngohkai ki bun ka jingmyntoi kam dei tang ïa ki nongpynïaid jong katei ka jaka jngohkai, hynrei ka pynmih bun ka khajna ïa ka sorkar. Nalor kata ka kyntiew ruh ïa ka ïoh ka kot jong ki paitbah nongshong shnong ha katei ka thaiñ.
Nalor kata na ka por sha ka por ka sorkar ka ju put ronsing ba kan kyntiew ïa ka ïoh ka kot ki paitbah lyngba ki kam jngoh kai, hynrei lada kam shimkhia ban pynbha ïa ki surok ki nongleit jngohkai kin ym kwah ban leit. U la bynrap ruh ba ha ka jingshisha u Director, Assistant Director bad ki ophisar jong ka Tourist Department, ki la dei ban pynleit jingmut bha kumba la bthah da ka sorkar. Hynrei lada ka long kumba ka long haduh mynta ka jingpynlut jong ka sorkar ban siew tulop ïa ki kam don jingmut satia.
U la ong ba naduh ba ka sorkar ka la ithuh ïa ka Mwphanlur kum ka jaka jngohkai kaba itynnad, ym pat ju ïohi wat shisien ïa u Director ne ki ophisar jong ka Tourist Department, ba kin wan sha katei ka jaka ban peit na ka bynta ban mang pisa na ka bynta ban pynitynnad shuh shuh.
Ym shym la don ki ban ai jingmut ruh ïa ki nongshong shnong kumno ba kin pyntreikam na ka bynta ban khring shuh shuh ïa ki nong jngohkai na kylleng ki ri ka pyrthei, na ka bynta ka jingmyntoi jong ka sorkar bad ki paitbah nongshong shnong.