Tur ki paidbah ka thaiñ Muliang sha ophis DC ban pyrshah pynkynriah ïa ka Block ophis na Nonglang

Nongstoiñ, Nailur 08: Ka jingthmu jong ka sorkar ban pynkynriah ïa ka Block ophis jong ka Rimuliang C&RD Block na ka shnong Nonglang sha ka shnong Tynghor ka la pynbitar lep ïa ki paidbah jong bun phew tylli ki shnong kiba hap hapoh katei ka Block. Kumta na ka liang ki nongïalam jong ka Joint Action Committee Rimuliang C & RD Block kaba kynthup naduh ki nongsynshar shnong riew rangbah ki sengbhalang, seng longkmie, seng samla shnong bad ki Village Organisation ha ka sngi saitjaiñ kane ka sngi hat majai ka 8 tarik Nailur ki la lum lang ïa ki paidbah na kitei ki shnong ban pynlong da ka jingïaid paidbah ha Nongstoiñ ban pynpaw ïa ka jingpyrshah kaba jur halor ka jingthmu jong ka sorkar ban pynkynriah ïa ka Block ophids jong ka Rimuliang sha ka shnogn Tynghor.
Ha katei ka sngi la sdang ïa ka jingïaid proseshon najan ka ophis jong ka Soil Conservation haduh ophis jong ka Deputy Commissioner ha kaba da ki hajar ki paitbah na ka thaiñ Muliang kynthei bad shynrang. Ha katei ka jingïaid rally shuwa ban poi ha ophis jong ka Deputy Commissioner West Khasi hills ki paidbah ki la shah khang lynti noh ha ki magistrate bad ki pulit hynrei hadien ka jingïakren kaba la neh kumba katto katne por na ka liang ki magistrate ki la ailad ïa ki shiphew ngut ki nongïalam ka Join Action Committee Rimuliang C & RD Block ba kin leit ban ïakynduh ïa ka Deputy Commissioner ha ophis trei kam jong ka.
Ha ka jingleit ïa kynduh jong ki nongïalam ka Joint Action Committee ïa ka SMT Hema Nayak IAS Deputy Commissioner ka West Khasi hills ki la ïoh ban ïatai sani halor katei ka mat ha kaba ki la aiti ruh da ka jingthoh ban kyrpad ïa ka ba kan pynsngew sha ka sorkar ba ka dei ban pynneh ïa ka Block ophis ha ka shnong Nonglang kumba la dep wan plie ïa u maw nongrim ha ka 16 tarik Naiwieng 2022 bad la buh ruh ïa ka ophis trei kam ba shipor ha katei ka shnong.
Hadien ba la mih na ka ophis trei kam jong ka Deputy Commissioner ki nongïalam ka JAC haba ïakren bad ki lad pathai khubor ki la pynpaw ïa ka jingsngew kmen namar ba ka Deputy Commissioner ka la kular ha khmat jong ki ba kan sa shimkhia halor katei ka jingdawa jong ki. Ha kajuh ka por shuwa ba kin mih noh na katei ka jaka ki la pynlong ïa ka jingïalang ba lyngkot ha kaba la ïoh ïa ka jingkren na ki katto katne ngut ki nongïalam ka JAC ba kynthup ïa u bah D.A Lyngdoh sordar jongka shnong Nonglang uba dei ruh u secretary ka JAC, u bah Sheiñborlin Kharwanñiang bad u bah Shaphrang Lyngdoh. Kitei ki rangbah ki la ther tyngeh ruh ïa u bah R.G.Momin MLA bad u bah Lurshai Kharbani MDC ha kaba ki la ong ba hadien ba ki la ïoh jingtip ba ka sorkar ka thmu ban pynkynriah noh ïa katei ka Block ophis na Nonglang sha Tynghor ki la leit ban ïa kynduh ïa u bah Momin MLA hynrei u la thet kti bad sait khuid ba um don jngtip ei ei ha kaba ïadei bad ka jingthmu ban pynkynriah ïa katei ka Block.
U bah shaphrang Lyngdoh u la ther tyngeh ïa u bah Momin bad u bah Prestone Tynsong Symbud Myntri Rangbah ka jylla bad ïa u Conrad Kongal Sangma Myntri Rangbah ka jylla halor ka jingïaleh khunja kai ïa katei ka Block bad ka jingbym kheiñ snep ïa ka mon u paitbah . Ha kajuh ka por ki la ther tyngeh da kaba ong ba lada ka logn kumne ka pynishai kdar ba ka dei ka sorkar kaba thaw ïa ki jingpynklumar shnong bad kaba wan rah ïa ka jingbym shong suk shong saiñ ha baroh ki bynta jong ka jylla.
Nalor kata u la ong ruh ba katei ka jingïaid paitbah bad ka jingïalang ha katei ka sngi kam pat dei satia kaba kut hynrei lada ka sorkar kam sngap ïa kaei kaba ki la dawa ki hap ban shim sa da kiwei pat ki lad ki lynti bad kan poi wat haduh u pud ba ki paitbah ki hap ban shim ïa ka aiñ ha la ka kti tangba lada ka jia kumta u MLA bad ka sorkar ki hap ban shim ïa ka jingkitkhlieh namar na ka liang ka JAC kam don jingrem ei ei ruh em namar ba ka ieng halor ka nongrim jong ka hok kumba ka sorkar ka la dep wan plie ïa u mawnongrim bad wan ai ïa ka Block ophis ha ka shnong Nonglang kam don hok shuh ban dang shim ïa kaba ka la ai.