Nongstoiñ, Risaw 5: Namar ka jingsniew jong ka surok na Marang sha Rambraibah kaba jngai tang kumba 2.5 kilomitar, ki nongïalam ka FKJGP Rambrai circle lyngba ka hok wad jingtip, ki la lap ïa ka jingshisha ba ka sorkar ka la dep khot ternder ban maramot ïa katei ka surok bad ka pisa ba la mang ka long 2,24,95,200 na ka bynta ban maramot ïa katei ka surok. Nalor kata ka PWD ka la dep aiti ruh ia ki final work order sha ki shiphew ngut ki kontraktor ba kin trei hynrei haduh mynta kim shym pat la sdang.
U bah Jistarland Lyngkhoi president ka FKJGP Rambrai circle haba kren ha ki lad pathai khubor, u la ong ba mynta ka sngi palei ki la leit ban ïakynduh ïa u Executive Engineer ka PWD Nongstoiñ Division, ha kaba ki la aiti ruh ha u da ka jingthoh ban kyrpad ïa u ba un bthah ïa kitei ki kontraktor ba kin sdang noh ïa ka jingtrei khnang ba kan ym pynthut ïa ka leit ka wan jong ki paitbah.
Nalor kata u la ong ruh ba hadien ka jingïakren sani bha u Executive Engineer u la ong ba namar ha kine ki sngi u slap u dang jur ban maramot ïa ka surok ka dang shitom. Kumta ynda ka aïom slap ka la kut un sa btah ïa ki kontraktor ba kin sdang noh ban pyntrei namar ba ka por ba la buh ban pyndep ka dei tang haduh u bnai Ïaïong jong u snem ban wan.
