Nongstoiñ, Naiwieng, 1: Naduh ba ki Kontraktor kiba don hapoh ka shatri jong ka PHE Western Circle Contractors & Suppliers Association kaba kynthup ïa ka Mairang, Nongstoiñ bad Mawkyrwat Division, kiba hap ha ka jingpeit jong ka Western circle ki la sangeh noh ban pyntrei, ka la buh ïa ki paitbah ha ka jingeh kaba khraw namar ha kine ki sngi ka la sdang ban tyrkhong.
Ka jingsangeh jong ki Kontraktor jong ka PHE kam dei tang ha kaba pynbiang ïa ki pipe line, hynrei ka jingpynbiang ïa ki main dam, ki top pynlang um (reservoir) ki ban pynpoi um sha ki top kiba kham rit ban pynpoi um bam haman la ki thliew ïing lyngba ki distribution pipe line.
Hadien ba la ïoh jingtip ba da ki phew tylli ki shnong ki la mad ïa ka jingkyrduh um, u nongthoh khubor u la leit ban jurip ïa ki katto katne ki jaka ba la shna ïa ki top um bad la lap ba ki don ki top bad ka um ka shlei bad ka tuid ha madan la kum ka wahduid bad la lap ruh ba ki don ki pipe jri kiba la pynngam na jong kawei ka top heh ban pynpoi um sha ki katto katne ki ïing kiba kham jan na katei ka jaka.
Ha ka ïakynduh ïa u bah K.Wahlang, u la ong ba ïa ki pipe la dep pyndait lut naduh katei ka jaka pynlang um bad la pynpoi ha baroh ki thliew ïing hynrei ka um kam poi satia.
Kum ban pynkynmaw ba ha u bnai Nailur ba la dep u bah J.T.S Thongni President ka Association haba kren sha ki nongthoh khubor, ki la dep pynbna paitbah ba kin sangeh noh shuwa ban pyntrei ïa broh ki jingtrei kiba dei jong ka tnad PHE. Ka daw ka dei namar ka jingshim noh jong ka sorkar ïa ka pisa kaba ki Kontraktor ki dei ban ïoh na ka bynta ban siew ïa ka bai trei sha ki nong bylla, ka la pynlong ïa ki kontraktor ba ki hap ban sangeh noh namar lada pyntrei ruh ki hap ban pan da ka ram.
Ha katei ka por u bah Thongni u la pynshai ruh ba ka jingshim bad khate jong ka sorkar ïa ka pisa kaba ki Kontraktor ki dei ban ïoh, ka long na ka bynta ba kan siew sha ki Kompeni kiba heh kiba shna ïa ki pipe um na ka bynta ban pyndap ha ka ri India baroh kawei. U la pynshai ruh ba ka jing siew jong ka sorkr sha ki Kompeni ka long na ka bynta ka bai kit bai bah bad kiwei kiwei kaba kot da ki hajar klur ha ka shi snem.
Nalor kata u bah Thongni ha katei ka por u la ong ba lada ka sorkar jylla kam lah ban pynphai noh ïa ka jingdawa jong ki kontraktor ba kan siew ïa ki bill ha shuwa ban kut une u snem 2022, ka Association kam banse ban leit tied jingkhang sha Ïing bishar ban dawa ïa ka hok jong ki.
