Shillong, Risaw 10: Ka khubor ba la ïoh na ki pulit la ïathuh ba ha ka janmiet jong ka 9 tarik mynta u bnai, ki pulit ki la lap ïa kawei ka scooter kaba la shu ieh bad kaba khlem don ïa ka number plate najan DGAR Office kaba ha Laitumkhrah, Shillong, kaba la ïoh ruh ka jingujor ba dei kaba la shah tuh na St. Anthony Parking Lot, Shillong ha ka 12 tarik u Nailur, 2024.
Ha kawei pat ka jingjia ki pulit ki la ïathuh ba ka Banrilidor Nongkynrih ka la phah ka jingujor ba ha ka 2 tarik mynta u bnai, ki runar bym lah ban ithuh ki la prong hapoh ka dukan jong ka kaba ha Riatsamthiah Block-II, Shillong bad ki la tuh ïa ki tiar kiba shongdor kumba T. 25,000/-.
Shuh shuh na ka liang ki pulit ki la ïathuh ba ka Headmistress jong ka Albin Lamare Memorial Secondary School, Nangbah (WJH) ka la phah ka jingujor ba ha ka 7 tarik mynta u bnai, ki runar bym lah ban ithuh ki la tuh ïa kawei ka CPU, artylli ki inverter battery bad kawei ka projector napoh ka skul.
