Jowai, Nailar 24: Ka Myntoilang FC Bamkamar bad ka Lummuriap SC ki la jop ïa la ki jong ki jingïalehkai jong ka lympung (L) Joybell Suiam Memorial Football League 2026 Second Division bala pynïaid da ka Thadlaskieñ Sport Association, kiba long hynne ka sngi Nyngkong, 24 tarik u Nailar, 2026 ha madan Wahiajer Multi Sports Complex Stadium.
Ka jingïakhun kaba nyngkong la sakhi ïa ka Myntoilang FC Bamkamar kaba la pynliem noh da tang 1-0 kol ïaka Hunlang FC Rakabah. ïa kane ka namtam la thep da u Isaiah Suting haka minit ba 16.
Nangta ha ka jingïakhun kaba bud ka Lummuriap SC kala jop da 4-2 pyrshah ïaka Iawpynsin Wahiajer. Na ka liang jong ka Lummuriap SC kiba la pynkhihjar ki long u Alanroy Nongrum (1’), u Nangtei Synrem (30’), bad ar tylli ki kol na u Chibor Ryngkhlem (56 & 60). Ka Iawpynsin Wahiajer ka la thep ar kol da u Hoshen Lyngdoh (20’) bad u Hopingstone S Manner (36’).
Kawei pat ka jingïakhun jong kane ka sngi hapdeng ka Modymmai SC pyrshah ïa ka Maitchaphrang FC, ka la kut ha ka jingïakhaid da mar shikol (1-1). ïa ka kol na ka Modymmai SC la thep da u John Slong (38’), katba ïa ka kol na ka Maitchaphrang FC la thep da u Marbait Nongpluh (46’).
Ki jingïakhun ha kane ka sngi ba-ar (25/08/2026); haka por 10 baje mynstep ka Maya SC Wahiajer pyrshah ïaka Laru SC, haka por 12 baje shiteng sngi ka Tympang FC Wahiajer kan aireng pyrshah ïaka Shiparalok FC Umladang, khatduh ha ka por 2 baje noh phai sngi ka RC Dreaming Mupliang pyrshah ïaka Mukhla Nongrim.
