Jowai, Nailur 11: Ka United FC, ka Ryntih Mynsngat bad ka Namdong Christian Club ki la jop ïa la ki jong ki jingïalehkai jong ka lympung (L) Joybell Suiam Memorial Football League 2026 haka kyrdan Second Division bala pynïaid da ka Thadlaskeiñ Sport Association, kiba la long hynne ka sngi Thohdieng (11 tarik u Nailur, 2026) ha madan Wahiajer Multi Sports Complex Stadium.
Ka United FC kala jop da 1-0 kol ïa ka Lumkhudung SC ha ka jingïalehkai ba nyngkong, bad ïa kane ka namtam jong ka United FC la thep da u Benidict War haka minit ba 34.
Nangta ka jingïakhun kaba ar, ka Ryntih Mynsngat kala jop suk da 4-1 pyrshah ïaka Mukhla Veterans. U Elad Pale u la long u nongïalehkai uba kongsan tam jong ka Ryntih Mynsngat, ha kaba u la thep hat trick da ki kol ha ka minit kaba 3, 44 bad 51, kawei pat ka kol la thep da u Rimiky Mynsong (21’). U Armiky Pale (7’) u la pynïakhaid shipor ïa ka jingïakhun na ka bynta ka Mukhla Veterans.
Katba ha ka jingïakhun kaba lai ka Namdong Christian Club kala pynliem noh da tang 1-0 kol ïaka Rakabah Hunlang FC, bad ïa kane ka kol jong ka Namdong Christian Club la thep da u Wanpor Myria (32’).
La pyntip ba ki jingïakhun ha kane ka sngi Saitjaiñ (12/09/2026) ki long: Por 9 baje mynstep ka Iawpynsin Wahiajer kan aireng pyrshah ïaka Mukhla Mission; Por 11 baje mynsngi ka Kdiap Rising Sun FC kan ïakhun pyrshah ïaka Maskut.
