Trei shitom ki samla ban ri bad pynmih sniang, ïoh nam kum ka Best PG ha Bhoirymbong

0

Nongpoh, Naiwieng 20: Ka kynhun ri bad pynmih sñiang naka shnong Syllei U Lar ha Ri-Bhoi kaba la tip kum ka Ngin ïai Kyntiew Producer Group (Piggery Unit) haka sngi Balang kala ioh ban rakhe ïaka jingdap 1 snem jong ka jingïaid lynti kum ka kynhun ki samla kiba trei shitom ban ieng hala ki jong ki kjat bad kumjuh ruh ka jingrakhe bad lehkmen hadien ba katei ka kynhun kala ioh ruh ïaka nam kum ka Best Producer Group na u Myntri Rangbah ka jylla dang shen.
Ha katei ka sngi lehkmen la wan ruh ban don bynta lang da u Bah MK Kharmudai District Project Manager ka Basin, ki nongïalam katei ka Producer Group naduh u Bah Ribansing Nongbsap kum u President, Bistiful Jana Secretary, ki nongïalam shnong, bad kiwei kiwei ki riew rangbah.
Kum ban shu pynpaw ba katei ka kynhun ri bad pynmih sñiang ka dei kaba la sdang ka kynhun ki samla ha katei ka shnong hadien ka jingwan jong ka FOCUS ba kila lah ban lum ban lang ïaki nongri sñiaw ban thaw ïa katei ka kynhun bad ban ioh jingïarap ruh naka sorkar bad hapdeng ka jingtrei shitom ki samla kila nang kiew bad pynheh haka kam ri jingri haduh ba kila ioh nam ruh kum kawei naki Producer Group ba treikam tam haka thaiñ Bhoirymbong bala pynbna da u Myntri Rangbah ka jylla. Naka liang u Bah MK Kharmudai kum u kongsan haba kren ha katei ka sngi u la ai mynsiem ïaki samla ba kin dang kiew shaphrang ha katei ka kam kaba ki trei ban long ruh ki nuksa sha kiwei pat ki khun samla ba kam dei tang ka kam sorkar kaba lah ban pynim ïaki khun samla ha kine ki sngi kyrduh kam ba mynta, hynrei ban ieng hala ki jong ki kjat ka long ka jingkyrmen bad ka jingai mynsiem ïa kiba bun ki samla kiba khlem kam khlem jam.

Leave A Reply

Your email address will not be published.