Thung u Pope Francis ïa u Rev. Fr. Wilbert Marweiñ kum u Bishop thymmai ka Jyllaniam Nongstoiñ

Shillong, Rymphang, 04: Ka jingap khmihlynti jong ki paidriewngeit ka Jyllaniam Nongstoiñ ban ïoh ïa u nongsharai mynsiem bapura ka la wan urlong hadien hynriew snem haba u Pope Francis u la thung ïa u Reverend Fr Wilbert Marweiñ uba la 52 snem ka rta kum u Bishop ba thymmai jong ka Jyllaniam Nongstoiñ.
Ïa kane ka jingpynbna la pyntip paidbah ha ka sngi Saitjaiñ da u Archbishop ka Jyllaniambah Shillong u Most Rev. Victor Lyngdoh ha ka shithi ba la phah sha ki riewngeit.
“Da ka jingsngewnguh ïa u Blei, nga pyntip ïa phi ba u Most Rev. Leopoldo Girelli, u Apostolic Nuncio u la pyntip sha nga ba u Kpa Bakhuid Pope Francis u la thung ïa u Rev. Fr. Wilbert Marweiñ, u Parish Priest jong ka “Divine Savior Parish,’ kum u Bishop jong ka Jyllaniam Nongstoiñ,” la ong u Most Rev. Victor.
La pynbna paidbah ïa kane ha Rome ha ka sngi Satijaiñ, 4 tarik, Rymphang, 2023 ha ka por shiteng sngi.
Ïa u Fr. Wilbert Marweiñ la kha ha ka 17 tarik, Rymphang, 1970 ha ka shnong Rangblang – Sohsyniong mynba ka dang hap hapoh u pud u sam jong ka Jyllaniambah Shillong, bad mynta kaba la tip kum ka Jyllaniam Nongstoiñ. La pynkyntang Lyngdoh ïa u ha ka 27 tarik, Ïaiong, 2003 hapoh ka Jyllaniambah Shillong bad ha u snem 2006 u la leit pynïasoh sha ka Jyllaniam ba thymmai jong ka Nongstoiñ.
Ha u snem 1988 u la rung ha St. Paul’s Seminary, Upper Shillong bad naduh u snem 1991 haduh 1992 u la pule ha St. Xavier Minor Seminary, Shillong bad naduh u snem 1994 haduh u snem 1997 u la pule ïa ka Philosophy ha Christ King College, Shillong. Hadien ar snem u la long u nongsharai ha Pynursla, Jyllaniambah Shillong, naduh u snem 1999 haduh u snem 2003 u la pule sa ïa ka Theology ha Oriens Theological College, Shillong. Naduh u snem 2007 haduh u snem 2010 u la leit sha Rome, ha kaba u la ïoh ïa ka Licentiate in Missiology na ka Pontifical Urban University.
Hadien ka jingshah pynkyntang Lyngdoh, u la shakri kum u Assistant Parish Priest ha Ummulong, Jyllaniambah Shillong Shillong (2003–2005) bad naduh u snem 2005 haduh u snem 2007 u la long u Procurator jong ka Oriens Theological College, Shillong.
Ynda la pyndep ïa ka jingpule ha Rome, naduh u snem 2010 haduh u snem 2015 u la shakri kum u Assistant Parish Priest hapoh ka Jyllaniam jong ka Cosenza, Italy.
Naduh u Nohprah, 2015 haduh u Risaw, 2019, u la shah thung kum u Vicar General jong ka Jyllaniam Nongstoiñ.
Naduh u Nohprah, 2015 haduh mynta u la shakri kum u Parish Priest jong ka “Divine Saviour Church Nonbah” kaba hap hapoh ka Jyllaniam Nongstoiñ.